04 يونيو، 2009

من مسرح الحياه..




رفيجات ..

يحبون بعض..

عشره عمر وسنين..

اربعه وعشرين ساعه مع بعض..

توفى ابوها..

ما راحت عزا ابو رفيجتها ولا حتى مرتها لاشهر..

عذرها ما ابي اشوفها بهالحاله..

تمر السنين..

يتوفى اخوها..

تروح لها رفيجتها وتقوم فيها وباهلها..
واهيا الي عمرها ما دشت عزا الا عزا ابوها..

الكل يسأل منو هذي ومن بنته..

الله يعافيها ما قصرت ووايد اتعبت..

تدق على رفيجتها..

الكل يقول الله يعافيج وما قصرتي ولو وحده من اهلي ما جان قامت فينا جذي..

ترد عليها تقولها شدعوه احنا اكثر من خوات والله يعلم بمعزتج عندي..

ترد عليها تقولها..





ادري قلت لهم ما عندكم سالفه؟!!

يعني انتي بالله شمسويه؟!!


*****


جيران..

بنفس الدور..

الشقه مقابل الشقه..

يتلاقون عند الاصنصير..

السلام لله ما تسلم..

وان بدت جارتها ..

ما ردت عليها..

انقطعت الكهربا في شقتها..

على اولها طقت باب جيرانها..

افتحت لها الباب..

آمري.؟؟!

ما ادري شفيه الميتر..ماكو كهربا وريلي مو هني..

تلبس ثوب الصلاه وتسمي قبل لا تدش بيت الجيران وتروح للميتر وتشغله..

تبتسم وتقولها لي بغيتي شي ما يردج الا لسانج الجيران لبعض..

ثاني يوم..

تشوفها يم الاصنصير..

تسلم عليها ..


ما ترد؟!!


*****


ملتزمه دينيا..

شكليا وباللباس الشرعي..

سبحان الله وتبارك الرحمن..

كلمتين ما تفارقها..صايرين لزمه لها..

عينها بدوامها على اللي رايح واللي ياي..

فضوليه وحشريه ولازم تعرف اسرار الناس ..

واذا عرفت لازم تعطي رايها بالكل شي..

تشوف فلانه تعبانه مع ريلها وراح اتطلق منه..

تداوم معاهم الصبح والعصر تروح الكليه تكمل دراستها وبالليل مجابله امها المريضه على الكرسي المتحرك..

تمسكها وتقولها..






قطيعه شلون متحمله نفسج؟!!


*****

خوات..

دايما مختلفين..

بالآراء والافكار..

صديقه الكبيره تقولها..

اختج داقه على فلانه وتقولها لا تقولين لاختي..

اختي تغار..

تقاطعها الاخت..

واهيا تضحك..

تقولهاا الي قالت لج جذابه..

اختي ما تسويها ..

الاحترام الي بينا ما يسمح لها ..

اكيد فلانه فهمت غلط..

وان سوتها تمون..

لا تبطلين الموضوع..

اي شي بيني وبين اختي ..ما احب احد يتدخل فيه..

ترد البيت..

تسمع اختها تقول لرفيجتها ..

خلصيناا مالي خلقهاا ..

هذي بتيي الحين..

ليش قلتي حق رفيجتج؟!!





اكيد بتوصلها؟!!

هناك 7 تعليقات:

  1. غلطاااانة وصاحبتها مي كفو

    =============

    آنا هالنماين ولا حتى التفت عليهم من اسلم مره وما يردون

    الألعن ان في ناس تبتسمين لهم جنج سابتهم

    هذولي شلون تتعاملين معاهم بالله

    !!

    ==================

    الدين مو حجاب وكلام محفوظ ينقال

    الدين اخلاق

    وهذي عفوا ما عندها اخلاق

    ================

    مو كل اخت اخت يا لشيخه

    ياما صديقات احن من الخوات

    وياما خوات يبدونج على نفسهم



    رحلة ممتعة وناطرين رجعتج

    :**

    ردحذف
  2. زيونه فديتج

    :**

    هذي المواقف تصير وتبط الجبد..

    ودج تاخذين موقف.

    واتعوذين ما ابليس..

    واتكشكشينها عشان لا تعرض..

    تسلمين زيونه وراح توحشيني..

    ردحذف
  3. انا يبط جبدي الي اسلم عليه وما يرد

    او اكلمه بكلام حلوو

    ويتفل بويهك

    للأسف

    النفوس تغيرت

    ردحذف
  4. بانوراما ..

    المشكله مو النفوس..

    اهلنا علمونا على الطيب..

    افشاء السلام والابتسام صدقه..

    ان يكون عندي كلام طيب واذا ما عندي اسكت..

    اشجع غيري واساعده اذا قدرت..

    احفظ اسرار بيتي وماعطي في اهلي لو كان هالشي يجرح..

    هالموروثات صح..

    بس ليش ما اتطبق..

    وليش اذا طبقتها ..يحسسونك انك ياي من عالم ثاني؟؟

    حياك الله

    ردحذف
  5. (1)
    " يعني انتي بالله شمسويه؟!!"

    هجمة استباقية :) هذا ملخصها
    لما تحس بانها مقصرة و مقللة لغيرها : تبادر بالهجوم حتى تغطي عيبها و تقلل من شأن غيرها ..
    هذي الجملة –بالنسبة لي – تبين مقدار الشعور بالحسرة و الألم فيها و ان كانت ما تظهره بسبب موقفها البائس من صيقتها
    استغرب من ناس يحترقون من الداخل و يتعذبون لأنهم يكابرون في الاعتراف بنقائصهم!

    (2)

    طلبها للمساعدة كان لعجزها ، ما تحب تعترف بهذا العجز! لذلك اعتبرته شي و انتهى ما تبي تتذكره و رجعت لمكابرتها
    رد السلام عندها هو نوع من التذكير لها بلحظات عجزها و طلبها للمساعدة ، و لانها تعيش بحالة (تكبر) فهي ما تحب اللي يذكرها بلحظات عجزها و حاجتها..

    هالبشر طبيعتهم تعيسه ... لانهم يتمزقون بين واقعهم و بين "خيالاتهم" يوميا عشرات المرات...
    و العياذ بالله

    (3)

    في كلمة للإمام الحسين عليه السلام يوم عاشوراء منها (الناس عبيد الدنيا والدين لعق على ألسنتهم يحوطونه ما درة معائشهم فإذا محصوا بالبلاء قل الديانون).
    كل ما شفت هالناس .. تذكرت هالكلمة! و هي عين الحال .. يدعون الإلتزام و التدين لأن الدين مجرد كلمات على ألسنتهم .. تساعدهم في معيشتهم لا أكثر و لا أقل!!

    (4)

    تلون؟ نفاق؟ كلها كلمات ممكن تعبر عن الموقف،
    لكن أفضل أن اسميها (حيوانية).. العقاد كان دائما يشير للناس على انهم حيوانات و يصف النخبة منهم على انهم (حيوانات بعقول)! مثل ما الحيوان ياكل ابنائه اذا جاع.. فهذي تاكل لحم اختها مو بسبب الجوع و لكن بسبب عدم قدرتها على الانسجام مع ذاتها.. و هذا اسوء من الحيوانية!
    صعب على الانسان انه يعيش بشخصيتين مع البعيدين عنه، فشلون مع القريبين؟
    هذي تعيش بحالة تعارض ما بين وجهها امام اختها، و وجها امام اصدقائها.. غير منسجمة مع ذاتها،بالتالي هي بقرارة نفسها تعرف انها انسانة لا تملك لا مبادئ و لا قيم.. مجرد حالة حيوانية تعيش بدون هدف او غاية واقعية..
    اعوذ بالله

    ............................

    مسرح الحياة الجميل فيه انه فيه مقاربات كثيرة،اغلب الاشياء بالكون تملك صور مقاربة للي يصير بعالم الانسان عشان يبين ان الاوضاع ما تختلف و ان الانسان ما يختلف عن اي شيء آخر إلا إذا أراد هو الاختلاف... هذيل رفضوا الاختلاف و فضلوا انهم يكونون صورة اخرى مكررة من ملايين الشخصيات التعيسة اللي فشلت بالوصول لمعرفة ذاتها قبل معرفة غيرها...
    لذلك دائما اللي يبقى ذكره في الدنيا هو اللي قرر انه يختلف عن الباقين،، التاريخ دايما يسجل القلة لا الكثرة :)

    ردحذف
  6. عسى ما شر اخيتي مختفية

    عسى المانع خير

    مفتقدينج

    ردحذف
  7. السلام عليكم ورحمه الله..

    اخي العزيز سفيد..

    مبدع بمرورك ..

    اشكرك..

    *****
    أخي العزيز عثماني..

    ما تفقد غالي ان شاء الله..

    ما شر..

    بس الصيف والسفر وتغيير الجو..

    فقدتكم اكثر..

    ومشكوور على سؤالك..

    :)

    ردحذف