23 نوفمبر، 2008

ليه تسأل؟


ليه تسال من خطا ومن كان صح..
دام قصتنا انتهت شيفيد ... صح ؟
دام كل له طريقه وعالمه ويمكن حبيبه..
ليه ماتستوعب الى راح راح..
ماعشقتك يوم لاجل انك حنون..
ولا اظنك شفت في برقي سكون..
اختلفنا كم تذكر يوم كان الحب اكبر..
يالي كان اليوم لا يمكن يكون..
اي صح..
الغلط والصح عقب ما نوصل للنهايه يتساوون..
علاقه بين اثنين انتهت بخلاف لو مهما كان نوع الخلاف..
وانتهت بفراق..
ما تفرق منو الصح ومنو الغلط..
يفضل انه ما ينسأل هالسؤال في الحالتين..
اذا كنت حاب ترد العلاقه مع هالشخص..
او انك تبي تبرر موقفك حتى لو ما ودك ترجعون لبعض..
اذا بخاطرك ترد العلاقه يفضل ان ما تييب هالطاري عشان لا تفتح عليك بيبان تسكرت..
حاول تبدي صفحه يديده من غيراتهامات انا صح وانت غلط..
تبي تبرر موقفك وتطلع من هالسالفه وللابد بس بطيب وانك ما تشيل بقلبك ولا تبي الشخص الثاني يذكرك الا بالخير..
هم نفس الموضوع.. سكر على باب الاتهام .. ولا تدور بدفاتر القديمه..
شياب الطاري؟؟
رفيجت اختي..
تناقشنا بهالموضوع عقب الغدا..
كان رايها ان تبطل الموضوع وتسمع..
تبي تعرف منو كان صح ومنو الي غلط..
بالحرف الواحد قالت..
احس يهمني اعرف.. يمكن نكون فاهمين بعض غلط او ان كل واحد يبرر موقفه حتى لو ماكو امل انرد حق بعض.. بس حلو ان نفترق و مانكون شايلين على بعض شي.. و هم عشان نستفيد من الغلط و ما نكرره.. لأنه اخاف اكون انا الغلطانه فمو حلوه لي بعدين.. اهم شي تصفى النفوس و خلاص محد يشيل على احد..
كلامها يمكن يقنع بعضكم..
بس بما اني مؤمنه بمقوله لي فات الفوت ما ينفع الصوت...
مو مقتنعه كلش ملش..
بالاخير اقول..
تحية لنوال الكويتية لدفاعها المستميت عن مشاعر الحب الساميه بزمن ينطربون فيه على اغنية مين ده الي ما يعرف دودو :)
وليه تسأل...

20 نوفمبر، 2008

طيب.. وبعدين؟

مسااااااء الخير

طيبه = ساذجه
طيبه = هبله
طيبه = غبية
طيبه = ضعيفه الشخصيه
طيبه = قابله للضغاط والسخريه
طيبه = الطعن فيها حلال
طيبه = قابله للاستغلال

طبعا مو لان زمنا هذا معاييره اختلفت..

يقول الامام الشافعي:

نعيب زماننا والعيـب فينـا ... وما لزماننا عيـب سوانـا
ونهجوا ذا الزمان بغير ذنبٍ ... ولو نطق الزمان لنا هجانـا
وليس الذئب يأكل لحم ذئبٍ ... ويأكل بعضنا بعضا عيانـا


بس مجرد تمتعك بهالميزه الي ما فيها متعه كلش ..لانها ما راح اتييبلك الا التعب..لانك بتشيل قلبك النازف بين ايدك..

الكل يجرح فيك..وحتى اذا حاولت تزعل او تاخذ موقف.. قلبك ما يعينك..ترد تسامح..

ويردون يجرحونك.. لان الطيب ما له تقدير ولا احترام ...

الامام الشافعي يقول :

لما عفوت ولم أحقد على أحدٍ ... أرحت نفسي من هم العداوات
إني أحيي عدوي عند رؤيتـه ... أدفع الشر عنـي بالتحيـات
وأظهر البشر للإنسان أبغضه ... كما أن قد حشى قلبي محبات
الناس داء ودواء الناس قربهم ... وفي اعتزالهم قطع المـودات

تحاول .. وتحاول..

تدري عن الي يطعنونك بظهرك.. والي يجرحونك بويهك..

تدور الاعذار.. تبي تبرر لهم..

طيبه قلبك اكبر منهم..

تعطي اكثر وما تفكر انك تاخذ..

ما يهمك شكثر..اهم الي يهمونك..

ظنيت انك بتكسبهم.. لانك ما تحب تخسرهم..

والنهايه انك خسرت نفسك.. وهم ما كسبتهم..

وتكتشف ان قطع الموده ارحم من جرح كل مره..


فيرد يقول الامام الشافعي:


إذا المـرء لا يرعـاك إلا تكلـفـاً ... فدعـه ولا تكثـر عليـه التأسـفـا
ففي الناس أبدال وفي الترك راحـة ... وفي القلب صبر للحبيب ولـو جفـا
فما كل مـن تهـواه يهـواك قلبـه ... ولا كل من صافيته لـك قـد صفـا
إذا لم يكـن صفـو الـوداد طبيعـة ... فـلا خيـر فـي ود يجـيء تكلفـا
ولا خير فـي خـل يخـون خليلـه ... ويلقـاه مـن بعـد المـودة بالجفـا
وينكـر عيشـاً قـد تقـادم عـهـده ... ويظهر سراً كان بالأمس فـي خفـا
سلام على الدنيا إذا لم يكن بها صديق ... صـدوق صـادق الوعـد منصـفـا

بس الشي الي يهون عليك اكيد شرف المحاوله.. الحفاظ على قيمك ومبادئك.. وانك ما تغيرت نفس الي تغيرو..

19 نوفمبر، 2008

الصيد في الماي العكر

عدنا والعود احمدووو..

الصيد بالماي العكر..

والصياد الشاطر الي يعكر الماي عشان يسهل على روحه..

مو مثل الذيب الي يستغل الضباب عشان يستفرد بضحيته..

لااا ..اهو اكثر خباثه ولؤم ودهاء.. مو بس يستغل الوضع..لااا... يزيد التازيم اكثر واكثر.. على كثر ما يقدر.. يخطط ويدبر ويلعب وبمهاره.. يستغل خلاف ويضخمه.. ويعكر الجو اكثر واكثر..عشان انت تطيح ولا احد يسمي عليك.. وتكثر سجاجينك من كل صوب و ما تدري طقاقك وين..

يستغل الخلاف الي بينك وبين الي تعزهم.. ولي تعتبرهم غاليين .. يتقرب منهم ويظهر المحبه الي فقدها منك.. ويحاول ياخذ الثقه الي اهتزت بداخله.. ثقه كانت لك..

في لحظه سوء فهم.. يبدي بالتدليس.. التغرير والتمويه.. يخش نقص موجود ويدعي كمال مفقود..يلبس ثوب الملاك.. يصير الام والاب.. الحنان والرقه كلهاااا تشع منه... يبرز كل مهاراته .. يحسن كل شي.. بس عشان ياخذ مكانك..

يستمتع ويحس بانجاز.. ونشوه وانتصار ..عقب نجاح هالمخططات..

بس هم شاطر.. ما يبين هالشعور يلعب بحذر..شغله بسكات.. يحسبها عدل وماشيه معاه صح..

المشكله ان هالشخص الي كان عزيز راح ينغر.. ما ينلام الله يلوم الي يلومه.. وانت ما راح تستوعب الوضع الا متاخر.. يعني بعد خراب ملطا..

بتقعد تراجع حساباتك..

تلاقي سوء الفهم اساسا ماكان يسوى.. الجو العام للمشكله حصل له تضخيم فوق العاده كان اهو سبب لتأزيم الامور.. وبتالي انعدمت الحلول..لانك تعديت خط الرجعه..

الحسنه الوحيده بالموضوع انك اكتشفت معادن الناس الي حولك.. عرفت منو رفيجك ومنو عدوك.. منو الي كان ينافقك.. ومنو الي صج عزك..

بالنسبه للي صار.. انا اقول الله يهني سعيد بسعيده...:)

سعيدين وبعيدين على قولت ماماتي الله يحفظها..

ما راح اقول طبعا اذا الحياه ما تمشي سعيده الا بفرقاي ففرقاي عيد..

بس بما اني مو من النوع الي يلعب لعبة الازمات والاساليب القذره .. فالانسحاب والويه بالويه ابيض احسن قرار..

من غير حسافه اكيد..

غير على العمر والعشره الي ضاعت .. على شي كنت احسبه غالي..

18 نوفمبر، 2008

كلمة حق.. منو يقولها؟!!

صباح الخير..للي عندو صباح ومساء الخير للي عندو مساء..
اليوم يا طويلين الاعمار راح اتحلطم عن الشيطان الاخرس.
ولي ماخذين السلبيه عنوان ومنهج لحياتهم ..
صار من الصعب على الناس انها تقول كلمه حق هلأيام..
او حتى تعترض او توضح شغله غلط.. او تبرر تصرف غيرك.. من باب ابداء الراي ..
وخاصه لما نشوف شخصيه نرجسيه .. هالانسان الي يشوف روحه اهو الاحسن ..واهو الافضل والاذكى ..والناس كلهم لأ..ومع جذي يهمه راي الناس فيه.. مو عشان شي.. يبي المدح اكيد.. لان اذا ياله نقد او حتى تجاهل قامت الدنيا وما قعدت..
يستغل الناس ولا ترف له عين.. يلعب على الف حبل .. المهم يوصل للي اهو يبيه.. مشاعر الناس ما تهمه .. المهم اهو شنو يبي..
هالنرجسي يتيمعون دار مداره المنافقين وربع القيل والقال..
وبما انه يحب الاضواء تلاقيه يتمادى بمدح نفسه ويذم غيره...واكيد طبعا كلامه صح لان الحاشيه الي قاعده تطبله موافقه على كل كلمه يقولها من قبل لا يقولها بعد..
هالناس هذي معروفه وواضحه ما يحتاج ان الواحد يتكلم عنهم..
المشكله عندي بالي ساكتين عن الحق..
بالنسبه لي..
لو حقك وما طالبت فيه.. يعني انت مسامح بهالشي هذا ضياع حق..بس انت راضي.. انتهينااا
بس ناس تعزهم وما تفزع لهم؟؟ .. مو سالفه هوشه وذبح مذابح....لااااا
بس لما يغتابون صاحب لك او صديق او حتى معرفه.. ويقللون من قدره ومن قيمته وجدام مجموعه من الناس بعد..وانت شاهد و حاضر .. موجود وتشوف ان في ناس تأيد وانت عارف ان هالكلام ماله اساس من الصحه...
مو المفروض انك على الاقل تعترض؟؟... بس انك تسكت؟؟ ولا جنه اكو شي؟؟
انت ترضاها على روحك؟؟ترضى ان محد يرد غيبتك؟؟ بتعده شنو؟؟ شنو شعورك ؟؟ غير انك تحس بعدم اهتمام واللامبالاه بمشاعرك من شخص كنت عاده انسان قريب.. مو مثل الغير ..على اساس ان الي ما يعرفك ما ثمنك..
امي الله يطولي بعمرها ويحفظها لي كلا تقول الي ما يعدني فايده..ما اعده راس مال..
اذا حتى كلمه حق ورد غيبه ..او انك تقول رايك بشي انت تشوفه صح.. ما تقدرتقول .. وما تطلع منك هالكلمه.. لخوف او مصلحه...
ليش عايش؟؟
الموت احسن من هالحياه..
أنا ضد الإكتفاء على التأكيدات :ما انزل لمستواه.. أنا احسن منه اسكت عنه .. و السكوت من ذهب .. إلخ .
كلمه حق ولازم تنقال ..
فإما حياة تسر الصديق...وإما ممات يغيض العدى..
الحل؟؟
انك تاخذ قرار وموقف...
كلمه لأ .
راح تكون كافيه ووافيه ..
توقف هالناس عند حدهم وتفهمهم انك رافض هالشي ومومعاهم..
جرب تقولها.. ماراح تخسر..

17 نوفمبر، 2008

عادي .. طبيعي ..مزاجي... دووم ما حاتي

مساكم الله طيب...
لا طبعا مو اغنيه الجسمي...
بس ما لقيت احسن من هالتوبك للكلام الي بتقرونه الحين..
تقلب المزاج عند بعض الاشخاص شي غريب ومزعج وااايد في بعض الاحيان..
من الطبيعي للعادي لي الاعصاب وعقبها عدم المبالاه..
طول عمري اقول ان الناس طاقات..بالتحمل والصبر ..
محد صبر كثر ايوب عليه السلام بس منو فينا يقدر يصير ايوب؟؟ او حتى يتمنى هالشي؟؟
ما اعتقد احد يتمنى ان يصبر.. عن نفسي انا اقولها ما فيني صبر ..
يمكن لاني عصبيه واي شي يحرني.. حتى لو ما عبرت عن الي بداخلي حزتها بس هم ما يمر مرور الكرام.. لاني اكيد خذيت موقف..
المزاجيين يحرون الواحد..
عبالهم الكون ماشي على مزاجهم ومشتهاتهم..
اليوم يحب هذا باجر يكرهه..شوي رفيجك وشوي كثرهم عدوك ..
ما يرضى عليك واهو الي يجرحك... قمه التناقض..
انزين لو مزاجي على روحك محد له شغل فيك..بس مزاجي بتعاملك مع الناس.. شتوقع منهم؟؟
اول شي انت تصعب على الناس انهم يتقبولنك لانهم ان طوفولك مره وثنتين ..بيطوفون لك الثالثه؟؟ اتوقع لي متى؟؟
راح ينحاشون منك ويتحاشونك.. وعلى شنو؟؟ شنو السبب؟ .. المشكله ان ماكو سبب
انا فاهمه ان محد كامل ..والمزاجي هذا اكيد فيه صفات ثانيه تسوى ان الواحد يتحمله عشانها..
بس اذا طفح الكيل لا تامن السيل.. وقد اعذر من انذر..
يعني ما يصير عشان مزاجك متعكر تاخذ الامور بعصبيه وسوء ظن في الناس الي حولك وتكون حساس من كلمه تكبرها وتصير ازمه او من موقف عادي يسبب كره.. واتحول بقدره قادر حق مريض نفسي يعاني من البرانويا.. والناس تستغرب منك .. هذااا شفيه؟؟
نصيحه للمزاجيين... القراءه زينه .. كتاب (لاتهتم بصغائر الأمور فكل الأمور صغائر) للدكتور ريتشارد كارلسون.
فكر شوي وبعقل قبل لا تخسر الي حولك..

16 نوفمبر، 2008

أحمد مطر

من اروع ما قريت لدرجه قررت اخليها توقيع لي :

يَغْشَى الأَسَى رُؤايْ
يَظُنُّني سِوايْ.
لكنْ.. يَعودُ القَهقَرى
منُكَسرِاً.. حِينَ يَرى
في وَهَني قُوايْ
وَمُنتهى بدايتي
في بَدْءِ مُنتهايْ!
***
يأسَى بداخلي الأسَى
لأَنَّهُ مَهْما قسا
يَبقى هَشيماً يابسا
تَسحَقُهُ مُنايْ!
***
لَستُ أَتيهُ عِندَما
يُصابُ عَصْري بالعَمَى
فالدَّربُ يَمشي حَيثُما
تَحرَّكتْ خُطايْ!
***
لَستُ أَبيتُ خائِفا.
فاللّيلُ مِن ليلي اختفى.
والصُّبْحُ كُلَّما غَفا
أَيقَظَهُ ضُحايْ!
***
فِرعَونُ لَيسَ مُقلِقي
واليَمُّ لَيسَ مُغرِقي.
بُحورُ شِعْري طُرُقي
وريشتي عَصايْ!
***
لو أنَّ فرِعونَ سَما
حتّى تَجاوَزَ السَّما
وَمَدَّ مِنها سُلَّما..
لم يَستطِعْ أن يَرتقي
لِدونِ مُستوايْ!
***
أَنا أَنا.. مُنَى المُنى
دَليلُ رِحْلَةِ السَّنا
جابرُ فاقَةِ الغِنى
مَلجأُ ما عَدايْ!
***
أنا أسَى كُلِّ الأَسَى.
ولو أَصابني الأَسَى
لَما شَعَرْتُ بالأَسَى
إلّا على أسايْ!

صداقه في عالم الانترنت

مساكم الله طيب :)

اليوم يا محافيظ السلامه عيد ميلادي المجيد...

اكيد بتقولون حشى ما صارت صدام حسين...شالطاري الاقشر..

المهم طبعااا ومثل ما الكل عارف وطبعا راح اناقش هالشي هني لانه باط جبدي... بس بعدين...ان من الذوق انك ما تسأل المرأه عن عمرها..
طبعا بالنسبه لي لا عمرها ولا وزنها ولا طولها ولا عرضها ولا عن اي شي لين اهيا تسولف بروحهااا يكون احسن.. يعني من الاخير عن اللقافه لحد يسألني جم عمرج .....

فالبارح حاشتني مشاعر مخربطه...

استغربتها.. على كثر ما ونستني..

بما اني مدمنه بالتوك من سنين..
والي ما يعرف البالتوك اهو برنامج محادثه صوتي تقدر تنزله عن طريق http://www.paltalk.com/
بس صارلي اكثر من سنتين مع روم واحد فقط لا غير..

عرفت فيه ناس واجناس..كونت صداقات .. وبعد عداوات..

يعني نقدر انقول انه شي عادي .. يمكن احد يقول شكو عيل غاثتنا... اقولهم صبرا جميلااا..

الي صار ان الساعه 12 قلب حال الروم 360 درجه.. وهالشي ما راح تعرفون شلون الا اذا سولفنا عن الروم اول شي..

الروم فيها يوزرات مقيمه بصوره دائمه مثلي وشرواي..ومنهم يوزرات ومنهم ادمنيه..

يحكمنا قانون الروم الي سنه واقره الاونر ومجلس الادمنيه الي انا منهم .. احممممممم

والقانون ينص على ..

الممنوعات:
1 الجمب.. والي ما يعرف شنو يعني يدش البالتوك ويشوف..
2 تبديل الادوار.
3 التلفظ بكلمات او عبارات تخدش الحياء او الذوق العام.
4 التحدث بلغه اخرى غير اللغه العربيه او الانجليزيه
5 الاغاني من 5 الفجر لي 5 العصر ... يعني من عقب هالفتره ماكو اغاني....

الروم قبل سنه وشي كان شي خيال... ما ينوصف ...ضحك ووناسه وغشمره... بس طبعا دوام الحال من المحال...

ناس دشت الروم.. وناس طلعت ...ناست خربت .. وناس تحاول تعدل.. وناس وانا منهم صامدين ... لي متى؟؟؟ ما يندرى
وناس اعتزلت وانقرضت لاسباب وايد.. الي تزوج والي لهى بدراسته والي توظف ولي زعلان وما يبي يدش :(....

انا علاقتي حلوه مع الكل... المحترم يحترم وينحط على الراس والعين...الي يحاول يملق عندي دوا ممتاز ... اسمه الحقران...
وغيره الي يزودهاااا سبحان الله ما اشوفه بالروم بس الاقي F7 وجمله ابعد وغيب عنا الروم من غيرك جنه :)....

بس في يوزرات حبهم يدرعم بالقلب بدون استئذان..بنات وشباب.. مع العلم ان انا معروف عني اني نصيره البنات بس مو معناته ان مو بالحق..وهالشي يسبب لي بعض العداوات..

ما عليناا..

الي صار البارح..

عقب الساعه 12

استلم ذاك الايميل.. من اعز بنات الروم على قلبي وكل وحده فيهم كاتبه بايدها كلام لي ووصورته بالسكانر وطرشووه...

يمكن شي عادي او تافه للي يقرى... بس بالنسبه لي انا...

انا آخر مره شفت فيها احد يكتب شي بخاطره او قلبه بيده لاحد كان 1997.

وايد استانست من الحركه...

انرد للروم..

الروم كل الي اعزهم ارفعو ايدهم ومسكو دور ومن 12 لي 2 الفير اغاني عيد ميلاد لي انا.. مع العلم اغلبنا موظفين وطلاب والبوم دوامات يعني الله يعينهم على يومهم ..شكلهم راح يلعنون هاليوم ما سوت عليهم ...
لحد يقولي مجامله او لمصلحه...ماكانو مجبورين ولا مغصوبين.. شراح يستفيدون؟؟..

هالمشاعر الحلوه هذي استغربتها مو لانها منهم...يعني مو لاني ما توقعتها منهم كاشخاص...

بس لانها مشاعر من ناس ما شافوني ولا شفتهم.. علاقه نت لا اكثر..

وقت الي اعرفهم بره نسووو عيدي.. ولو ما اذكرهم ما يدرون...

لحد يقولي شالسخافه ... كلا عيد ميلاد...

اهي مسأله تقدير وذوق .. ترى انا مو ناسيه يا فلانه عيد ميلادج..هالشي حلووو.. يابابا ما نبي هدايا كلمه طيبه للي تعزهم وانك تراويهم انك تذكرهم تسوى...

على الاقل عندي تسوى...

في مره كنت قاعده في صاله بيتنا وامي الله يحفظها لي ويطول بعمرها حاطه مسلسل ومطوله الصوت حده..

ولا اسمع جمله كان نور الشريف يقولها لعياله " التعبير عن الحب اهم من الحب نفسه"

هالشي خلاني اقرر تغيير حساباتي...

قناعاتي...

وعلاقاتي..

شنو استفدنا اليوم من قرقتي؟؟...

الصداقه .. والاهم التعبير عن هالمشاعر لو ببساطه

بداية نهاية من البداية



ما راح اتفلسف وايد البداية كانت ان ولد خالي قرر ان يسوي وهالحجي من سنتين مدونه...

وفعلا هالشي صار..وقالي ...وكالعاده بما اني جدا مشغوله بالولا شي الي انا دايما مشغوله فيه ما شفتها ولاحتى القيت نظره..

قبل جم يوم وانا اتصفح جريدة الجريدة على النت ولا ادخل آخر كلام ولا اشوف المدونات..

طبعا شدني هالشي وااااااااايد..

فقررت اني راح ابدي على السنه اليديده...

وبما ان عيد ميلادي اليوم...فقررت ان السنه اليديده بدت...

وعلى اساسها طلعت قرارات هم يديده بتغير شامل كامل..

من ابرزها اني افضفض بلي في قلبي وبالي..

وهالشي وين بسويه؟؟

ما يبيلهاااااا..

هني طبعااااا

الله يعينكم يلي تقرون...

كاسرين خاطري من الحين..

بس ما عليه...

بسم الله نبدي...