16 مارس، 2009

هاديه وباسل..3


ودعتهم بابتسامه...

وقامت تشرف على الخدم لترتيب البيت بعد عاصفه حفله عيد الميلاد الي فاجئوها فيها..

تاخذ شاور دافي سريع..
تنسحب لفراشها البارد..
وتلتفت صوب مكانه في السرير ..
تلمس مخدته..
تهمس لها..
فاقدته مثلي؟؟!
ثلاث سنين ما نام في فراشه..
ما دش هالغرفه..
يدش البيت مثل ..غريب..

تذكر كلامه يوم المواجهه..

باسل: انا غريب.. غريب في بيتي.. انتي وعيالج.. بعالم..وانا محد يمي ولا يحس فيني..
ما لقيت الاهتمام في بيتي... لقيته معاها باهتمامها..بتواضعها..انسانه على طبيعتها..
مو تمثال رخام..بارد ما عنده احساس ولا مشاعر...
انا غريب وانتي السبب...لا تلوميني..
هذي مو نزوه...مثل الي اكتشفتيها قبل سنتين... ولا غلطه..مثل الي صارت قبل سنه..
هذا قرار..اتخذته.. ولو احد فينا غلطان
فهو انتي..
صدمتها خلتها تتحول فعلا لتمثال رخام..
كانت تبي تصرخ تبجي تسب وتلعن ..
كانت بركان ثاير ..
بس ما قدرت تعبر..
كانت بتقوله انت الي شكلتني على ما انا عليه..
انت بيدك وبرودك خليتني الشخص الي انت نفسك تذمرت منه الحين..
مع العلم ان عمرك ما شكيت..ولا حتى علقت على اي تصرف او معامله ..
اصلا كنت تبارك اي قرار او خطوه او تصرف اسويه بالبيت او اليهال او الخدم او حتى مع الاهل..


اكتشفت خيانته مرتين..
بكل مره سكتت ولا واجهته .. وتصرفت بهدوء وصبر..
نزلت من مستواها وكلمت غريمتها الاولى..وهددتها..وابعدتها عن طريجه بهدوء..
وبالمره الثانيه كان كافي بس ظهورها بالصوره عشان تنهي علاقته مع زميله العمل..
بدون لا تواجهه او تصارحه بمعرفتها لخيانته..
ولا تحسسه بفرق بالمعامله او بتغيير بنمط الحياه الي عايشينه..
متحمله مسئوليه بيتها وعيالها وخدمها..
ومع هذا يحملها مسئوليه خيانته لها وللمره الثالثه..
سكتت..


سكوتها طال..

اخذ سكوتها من محمل موافقه على خطوته..

بس سكوتها كان مراجعه لافكارها وحساباتها وتصرفاتها..

باسل طعنها ..غدر فيها بعد 17 سنه زواج..بالوقت الي تحتاج لظهر تستند عليه..طعنها بانوثتها وكرامتها..خانها وتوج الخيانه بزواج شرعي..

انتقل لبيته الثاني بكل هدوء.. وطلب من هاديه عدم اعلان زواجه الا بالوقت الي يقولها عليه.. ونفذت..


هل هالهدوء راح يدوم؟؟


يتبع..


هناك 11 تعليقًا:

  1. ردة فعلها غريبه ..
    جامده ..
    ضعف ولا هدوء قبل العاصفه ؟

    بالانتظاار بس لا تطولييييين لان نسيت الجزء الثاني رديت قريته

    :**

    ردحذف
  2. انجيييي..

    معاج غريبه والياي بالنسبه لي كان الاغرب..

    آسفه طولت على ما كتبتها بس انتي تدرين بالظروف..

    اتوقع راح تعرفين الجزء الرابع لان كان نفس مناقشتنا بيوم مع اميره عن هالموضوع..

    انشالله تذكرين..:)

    نورتيني

    :**

    ردحذف
  3. قريت الاول والثاني والحين هذا اذا كانت قصه حقيقيه انا اشوفها غلطانه ومالوم ريلها
    وحده بارده وهاملته تستاهل يحط فوقها اربعه مو وحده
    ترى شرع يايبااا ليش اتحاملون على الريال بتغيرون بشرع الله؟

    ردحذف
  4. يقولون بان الحطبة البريّة أصلب و بطيئة الاشتعال ، لكنها نارها أكثر حرارة .
    أحيانا الصلابة و القوة و التحمل ما تكون من علامات القوة ، لكن تكون من علامات الجمود .
    حسب القصة هذا هو الحال ، جـمود تام بحيث إن الرابط صار مجرد استمرارية للحياة لأجل الغير و نسيان النفس .. هالاشخاص يعيشون لغيرهم و في القصة هي اولادها ، و بذلك ما تعطي قيمة لحياتها .
    أي علاقة يتنازل فيها طرف من اطرافها عن قيمة حياته يعني تلقائيا ان الطرف الثاني ما يكون بحاجة له ، او يشعر بالانجذاب له لأنه طرف فاقد اي شيء ممكن يعطيه .
    لكن متى يستوعب الشخص إنه دخل بمرحلة الجمود ؟
    لما يشوف إن الأشياء اللي جمد نفسه من اجلها بدات تتركه بسبب جموده .
    الحياة مثل الكائن الحي بحاجة لحركة لتستمر ... و هذا هو المفقود .
    و بس :) ...

    ردحذف
  5. المجهول ..

    لا تحامل ولا شي..

    منو متحامل؟؟

    ****

    أخ سفيد..

    تحليل ولا اروع..

    اشكر مرورك..

    ردحذف
  6. بنظري المرأة لو عرفت المفتاح لرجلها لن تستطيع أجمل أو اذكي أو من تكون أن تحرك طرف لزوجها
    ولكن مشكلة النساء لا يتسخدمن الحيلة الا بالشر
    ولا تعتبرين هذا هجوم ولكن بعض من الواقع

    ردحذف
  7. مشاري..

    ما راح اعتبره هجوم..

    انا اعتقد ان في بعض الزوجات بعد انجاب الابناء تعتبر زوجها من المسلمات ..

    هالشي ممكن يكون سبب..

    بس الي ما افهمه ليش الزوج ما يسوي قعده مصارحه ويعطي انذارات..يمكن اتعدل الوضع وتصحى لروحها؟؟

    ليش يخليها تنبش من وراه وتطيح عليه؟؟

    اذا كان ناوي هالشي لغلط منها المفروض يصارحهاا..

    هذا رايي ..

    واشكر مرورك..

    ردحذف
  8. ما حبيت باسل ,جذاب شفت انها لاهيه عنك نكلم مافاد الكلام خلك شجاع وتزوج جدام الناس لانك مقتنع بالي سويته بس اهو ماسوي جذي لان عنده اححساس بالذنب
    اما هادية فهي مثل كثير سيدات تصبر علي ظلم الرجل علشان العيال ةالبيت بس همن كان لازم تاخذ موقف واتوقع هدوءها ينذر بعاصفة

    ردحذف
  9. Sweet Revenge

    معاج بان المفروض ينبه الزوج زوجته باهمالها ..

    يكلمها.. يناقشها.. يعطيها انذار..

    ويعلن قراره بنيته الزواج من ثانيه لانه استنفذ معاها كل الفرص والطرق..

    وحياج الله ..

    ردحذف
  10. صباح الخير بعد قلبي

    ترى هاديتج وايد حارتني واحسها سلبية

    ومطاوعته وصابره

    الريال يحب المره اللي تحارب عشانه

    واهي مو قاعده تحارب ابد


    تسلسل القصه حلو
    والسرد هادي وياخذنا لأجواء القصه بكل سلاسه


    كملي

    ردحذف
  11. هلا بالزين كله..

    اهيا كانت جبدي مجهول حاربت بالمرتين ..

    وسكوتها بالثالثه مو استسلام..

    استراحه محارب..

    ونورتيني..

    وانشالله اكمل..

    ردحذف