هاديه وباسل...

ما قدرت امسك روحي...

اليوم السبت 13\03\2010 الساعه 21:00

يا ربي انك توفقهم ..وتهديه لهاا.. ولبيتها وعيالهم..

تعب وسهر وألم وجرح من 2006 ما راح هدر..

صبرت والله عوضهاا خير..

2010

بديت احبج..

2010×2009

2009..

سنه غريبه..عجيبه..

غيرت مساري.. خريطه حياتي ومعالمها..

أكثر سنه سافرت فيها..مع الأهل ..الأصدقاء..أو بروحي..

أكثر سنه هسترت ..بجيت فيها.. بسكات..وساعات من غير دموع..

تهورت فيها بقرارات.. رد الفعل كان عكسي..

صداقات تفركشت..وغيرها صارت أقوى..واشد..

مواقف بينت..منو الصادق..من المنافق..

ناس غابت..بارادتها..وناس غيبتهم بقرار..عناد؟؟ بس باصرار..وغابوو..

اشخاص برزو..لمعو لفتره طويله....بس مو كل من لمع صار ذهبه..طلعو فالصوو..نحاس..

وشتان بين الثرى والثريا..

انكشف امرهم..ومسحتهم من حياتي..

من غير اسف.. ولا ندم..لان كان لازم يمرون بحياتي..

اشخاص يدد..مثل النسمه البارده..بظهر القايله..

الله يعينهم علي..

بعد كل اللي شفته ..عاصرته وعانيته..ما اقدر اصفي النيه..

بعد كل اللي صار..مو مستعده اتنازل.. حتى بأقل القليل..

ان كان لي حق بشي..ابيه..وما راح اطوف..ولا اساير..

غلط؟؟ يمكن..مو ذنبهم؟؟ اكيد...

ليش اعامل وآخذ ناس بذنب ناس؟؟

لاني بالأخير بشر..

انا مو ملاك..

طيبتي ضيعتني سنين..

ذكرايات الماضي خذت مني وايد..

تأخرت؟؟ ايي ..بس بلحق على اللي طافني..

انا ..انسان يديد..

احاول اكتشفه واتعامل معاه..

2009 على كل مافيها..

من حلو ..ومر..

راحل..بلا عوده..

بس شكرا..

على الطراقات..

منها تعلمت..

وانشالله ما تتكرر..

أمنياتي بــ 2010

أمي غلاتي وغناتي..ابيج معاي العمر كله بخير وصحه وعافيه..

أشوف مشور ولد أخوي بحضن فيون وفلا..

أزور اختي في بيت حمولتها..

هدى ونرمين وآمال ودلال.. الله يحقق لهم كل أمانيهم..و تهدى النفوس..ونرد انتيمع على خير ومحبه..

انجي متخرجه.. ريم واميره وشق شق وعهود وبيور و زيزي مرتاحين البال..بسعاده وهنا يا رب..

بنات دوامي..لاحظنا ان كل بنات دوامي آنسات عزباوات..الظاهر منقينا نقوه...انشالله ما تعدي هالسنه الا وكل وحده فيهم في بيت العدل..

ابي الرضا..

لي انا..

ارضى عن نفسي..

انا متعبتها وايد..

انشالله ترتاح..

وترضى..

سنه يديده سعيده..على الكل..يا رب..

بعز النفس ..

بعز الدموع اللي غشت خدي عقب فرقاك
وآداوي نزف جرح آنسان دمه من شراييني
وآعز النفس عن حبك ما دام آني عجزت آلقاك
تعبت من الصبر وآتعبت من كثر السهر عيني
تعبت آستعطفك وآرجيك وآمشي في سبيل رضاك
وتلعب بي على كيفك تبعدني وتدنيني
تحملتك وآنا صابر وآدور لك عذر لخطاك
ولكن مانفع صبري معك واليوم يكفيني
خلاص اليوم قررت آنسحب من دنيتك وآسلاك
آبرحل ما ألتفت لو صاح لي صوتك يناديني
أبرحل للبعيد الي ينسيني أسى دكراك
وابترك كل شيء منك لا شفته يبكيني
وبخفي عنك وين أرحل ولا تسأل علي أنهاك
اذا قادك فضولك يوم انسى آنك تلاقيني
بعوض ما مضى لي من سنين عشتها وياك
كفى ماضاع من شانك من آحلى وآجمل سنيني
آبا عز الدموع اللي غشت خدي عقب فرقاك
وآداوي نزف جرح آنسان دمه من شراييني
وآعز النفس عن حبك ما دام آني عجزت آلقاك
تعبت من الصبر وآتعبت من كثر السهر عيني
آبا ركب مركبي وآبحر وآدورلي بدل مرفاك
شواطئيك الكئيبة حطمت كل الآمل فيني
بكن الهم في صدري وآسافر للبعيد هناك
عسى الآيام والغربه من جروحك تداويني
صحيح بغربيتي بتعب ولكن في سبيل آنساك
بعزي بالصبر نفسي ولو محدٍ يعزيني
نعم مليت نكران الجميل وطبعك ومبداك
وقلت البعد عنك آرحم ما دامك ترفض تجيني

22-08-09

أول يوم رمضان..

راحه نفسيه..روحانيه..ايمانيه..

نفسيه اخوي المتعكره على سبه الزقاير..

فيونه وفلاتي ووحده تحر الثانيه انا صمت اكثر منج بساعه..

اختي اللي مستانسه انها مو عطشانه ..وتحس ان الله مبرد عليها لنيتها انها تصوم..

صار لقبها ولمده شهر كامل رابعه العدويه..

خالي اللي يتشره من متى مو شايفنا..

ولد خالي اللي صار له شهرين بالكويت ولا رفعت عليه سماعه..

العذر الازلي...دوامي ماخذ وقتي..

مسجات تهنئه لناس افترقت عنهم..بس ما هان علي يدش الشهر وما اهنيهم..

تعب الوالده واهي تحرص ان الكل يكون راضي..

يمعتنا امس..

كنت فاقدتها...

رمضان..شهر الخير..شكرا..

اللَّهُمَّ اجْعَلْنَا إِلَى جَمَالِ آيَاتِكَ نَاظِرِينَ، ولِرَوَائِعِ قُدْرَتِكَ مُبْصِرينَ، وَإِلَى جَنَابِكَ الرَّحِيمِ مُتَّجِهِينَ، وَاجْعَلْنَا عَلَى نَهْجِ النَّبِيِّ المُصْطَفَى - عَلَيْهِ أَفَضَلُ الصَّلاَةِ وَأَزْكَى التَّسْلِيمِ - سَالِكِينَ، وَبِسُنَّتِهِ وَهِدَايَتِهِ عَامِلِينَ، وَبِآثَارِهِ مُقْتَفِينَ، وَمَتِّعْنَا اللَّهُمَّ بِصُحْبَتِهِ فِي جَنَّاتِ النَّعِيمِ. اللَّهُمَّ اجْعَلْنِي أَخْشَاكَ حَتَّى كَأَنِّي أَرَاكَ، وَأَسْعِدْنِي بِتَقْوَاكَ، وَلاَ تَجْعَلْنِي بِمَعْصِيَتِكَ مَطْرُوداً، وَرَضِّنِي بِقَضَائِكَ، وَبَارِكْ لِي فِي قَدَرِكَ، وَانْصُرْنِي عَلَى مَنْ ظَلَمَنِي. اللَّهُمَّ بَلِّغْنا رَمَضَانَ.. اللَّهُمَّ بَلِّغْنا رَمَضَانَ.. اللَّهُمَّ بَلِّغْنا رَمَضَانَ..
اللَّهُمَّ اجْعَلْ عَمَلَنَا كُلَّهُ خَالِصَاً لِوَجْهِكَ الكَرِيمِ..

اعاده الله على الامة الاسلامية باليمن و البركات..

وعساكم من العايدين الفايزين..

من مسرح الحياه..

رفيجات ..

يحبون بعض..

عشره عمر وسنين..

اربعه وعشرين ساعه مع بعض..

توفى ابوها..

ما راحت عزا ابو رفيجتها ولا حتى مرتها لاشهر..

عذرها ما ابي اشوفها بهالحاله..

تمر السنين..

يتوفى اخوها..

تروح لها رفيجتها وتقوم فيها وباهلها..

واهيا الي عمرها ما دشت عزا الا عزا ابوها..

الكل يسأل منو هذي ومن بنته..

الله يعافيها ما قصرت ووايد اتعبت..

تدق على رفيجتها..

الكل يقول الله يعافيج وما قصرتي ولو وحده من اهلي ما جان قامت فينا جذي..

ترد عليها تقولها شدعوه احنا اكثر من خوات والله يعلم بمعزتج عندي..

ترد عليها تقولها..

ادري قلت لهم ما عندكم سالفه؟!!

يعني انتي بالله شمسويه؟!!


*****


جيران..

بنفس الدور..

الشقه مقابل الشقه..

يتلاقون عند الاصنصير..

السلام لله ما تسلم..

وان بدت جارتها ..

ما ردت عليها..

انقطعت الكهربا في شقتها..

على اولها طقت باب جيرانها..

افتحت لها الباب..

آمري.؟؟!

ما ادري شفيه الميتر..ماكو كهربا وريلي مو هني..

تلبس ثوب الصلاه وتسمي قبل لا تدش بيت الجيران وتروح للميتر وتشغله..

تبتسم وتقولها لي بغيتي شي ما يردج الا لسانج الجيران لبعض..

ثاني يوم..

تشوفها يم الاصنصير..

تسلم عليها ..

ما ترد؟!!


*****


ملتزمه دينيا..

شكليا وباللباس الشرعي..

سبحان الله وتبارك الرحمن..

كلمتين ما تفارقها..صايرين لزمه لها..

عينها بدوامها على اللي رايح واللي ياي..

فضوليه وحشريه ولازم تعرف اسرار الناس ..

واذا عرفت لازم تعطي رايها بالكل شي..

تشوف فلانه تعبانه مع ريلها وراح اتطلق منه..

تداوم معاهم الصبح والعصر تروح الكليه تكمل دراستها وبالليل مجابله امها المريضه على الكرسي المتحرك..

تمسكها وتقولها..






قطيعه شلون متحمله نفسج؟!!


*****

خوات..

دايما مختلفين..

بالآراء والافكار..

صديقه الكبيره تقولها..

اختج داقه على فلانه وتقولها لا تقولين لاختي..

اختي تغار..

تقاطعها الاخت..

واهيا تضحك..

تقولهاا الي قالت لج جذابه..

اختي ما تسويها ..

الاحترام الي بينا ما يسمح لها ..

اكيد فلانه فهمت غلط..

وان سوتها تمون..

لا تبطلين الموضوع..

اي شي بيني وبين اختي ..ما احب احد يتدخل فيه..

ترد البيت..

تسمع اختها تقول لرفيجتها ..

خلصيناا مالي خلقهاا ..

هذي بتيي الحين..

ليش قلتي حق رفيجتج؟!!





اكيد بتوصلها؟!!

عشان الكويت..

تحسفت على اختياري 2008

انشالله ما يتكرر هالشي...

مستقبلنا بيدكم...لا تضيعونا...

لي متى؟؟

مو اعذار..

لا تبطلين هالموضوع ..

انتي تدرين ..انا من 3 سنين ما سمعت حسه..من عقب حب عشره سنين انا الي وخرت..

يعني لا اهو يحرضني ولا شي..هالشي باختياري..

عايشه على ذكرى ايامي الحلوه..

انا ما اشوف بهالكون ريال الا اهو..ما اتخيل نفسي مع ريال ثاني..

حياتي ومستقبلي مع غيره شي مستحيل..

ما اقدر..

ليش محد فاهمني..

شلون تبوني اشوف فلان أو علان ويشوفي.. يعاين البضاعه الي بالفاترينه..يتمقل بالطول والعرض ..اناسبه ولا لأ..سلعه معروضه..شي مادي ما فيه احساس..

وبعد حوار متروس شروط انا ابي وابي وابي ..يسألون عنه..

والمفروض اصلي استخاره ..وخلاص آخذه..اسبوعين واناديه حبيبي؟؟؟...

غيري يسونها..

انتوو سويتوها ..

الناس قدرات ..

وانا ما اقدر..

نفسيا ما اتقبل..

ما اقدر اظلم هالشخص واظلم نفسي ..واخون قلبي وحبي..

تطالعهاا..بحسره عليها.. وترد..

يا بنيه صدقيني كل ما اشوفج قلبي يعورني عليج..لي متى بتنطرين..لي متى هالاعذار..

ما مليتي؟؟...

الكل قالج وبيقولج..ما منه فايده..

لو يبي ياخذ قرار..وموقف..يتحرك يسوي شي..

لا تقولين اهو بعد ناطر..

اهو ما راح يضره شي..اهو ريال..

انتي الي سنين عمرج تطوف..تركض..وانتي بعدج بنفس المكان..

الي اصغر منج تزوجو وعيلوو..

حنانج وكلامج مع عيال اخوانج..كل شي واضح..

حنين لعاطفه الامومه..

ما تقدرين تخشينه..عيونج تفضحج ..

لا يغرج شكلج الي ما يعطي سنج..

بييج يوم تندمين..

الي معتمده على وجودهم اليوم ..بعد عمر طويل بيمشون بدرب كلنا بنمشيه..وقتها شراح تسوين؟؟..

غمامه حبج عاميتج..

لا تقولين وفاء واخلاص..انتي قاعد تضحين..والنتيجه معروفه..

ياما بنات حبو وصارت ظروف تمنعهم ..شافو مصلحتهم وتزوجو والله وفقهم..

انتي لا اول وحده ولا آخر وحده تحب وما تطول..بس انتي ناطره بدون امل ولا مستقبل وهالشي غلط..

شناطره ؟؟ بس ابي افهم شنو ناطره..اهو ما سوى شي من قبل..

اشلون بيسوي بالمستقبل؟؟وشنو الي يضمن لج؟؟..بتنطرين لي متى؟؟..

لين إيي اليوم الي يوصلج خبر زواجه؟؟!..

انتي الحمدلله لي الحين اتييج فرص.. وفرص زينه..لا توقفين نصيبج..

فكري يا بنت الناس..

وانا ادري..

سامعه هالكلام مني ومن غيري ..

كلنا معاج ونحبج ونعزج..

وكلامنا من محبتنا لج وخوفنا عليج..

ولو ما تهمنا مصلحتج..ما هاجمناج..

نبيج تصحين وتفكرين..

فكري.. الله يهديج..

*****

ليش الي نبيه ما يكون لنا..ومو من نصيبنا..؟؟

ليش كل شي ينقلب ضدنا..والكل يحاربنا..حتى اقرب الناس لنا؟؟..

ليش الناس ما تتقبل الوفاء والاخلاص؟؟..

ودام ما فيه امل ..ليش نعلق مصيرنا ومستقبلنا بشي مستحيل؟؟..

حلم من احلام كويتي غيور..

منقول...لعوار القلب الصباحي...

يا رب تحمي ديرتنـا الكويت وتحفظـها من كـل شـروعسى ربي يحفـظ أهلـها ..

هاديه وباسل..4

تتقلب.. بفراشها.. الي نسى الدفا..

تمسح دموعها الي كانت حمم بركانيه.. كلها الم وحزن وانكسار..

كانت توها مسكره التلفون من الباسل..

تتذكر كلامها..

حبيبي محتاجتلك.. تعال.. ابيك.. ولهت عليك..

تعال والي تبيه بيصير..خل انتفاهم..اسمع لي واسمعك..

لا تنهينا..

انا محتاجتلك وعيالك محتاجينك..وبيتك..

انا ما اقدر اعيش في البيت هذا لحظه وانت بعيد ..وانا ادري انك ما راح ترد.. وانك بحضن وحده ثاني غيري ..

هالشي يذبحني يقطعني..انا مو قادره اتحمل..

انا مستعده للي تآمر فيه..

عطنا فرصه.. نرد ونصير احسن..

عشان حبنا وعشرتنا وعيالنا.. تعال ..

جملتين الي قالهم وسكره..

لعبتج القذره وتمثيلج مو علي..انا ما اعتقد اني بييكم اليوم..لي فضيت بمر..

انهيار تام..

تفكير متواصل.. نست النوم..

عافت الاكل..

كرهت الحياه..

بس كلمه ليش..

وشنو الغلط ..

ما تروح من بالها..

كانت هذي بدايه التحول ..

قررت ان الطلاق اهو الحل..

كلمته.. رفض..الحت..

طلب منها انها اتعايش مع الوضع..رفضت..

راحو المحكمه.. مخالعه.. وكل واحد فيهم عينه تدمع..

بعد اسابيع من الانهيار النفسي..

هاديه..قررت تعيش لنفسها وبس..

نفضت عنها كل الانكسارات..

كملت دراستها.. توظفت بشركه خاصه..

كونت علاقات وصداقات..

بس ما غاب عنها..

كانت تدق عليه .. وتكلمه لما ايي البيت..

تكلمه بكل شي يصير وصار معاها..عن البيت واليهال.. دراستها ودوامها..

بس ابد ما تكلمه عنهم..ولا عن علاقتهم اليديده الي مو لاقيه لها اسم..

تكلمه مثل ما تكلم صديق قريب وبنفس الوقت بعيد..

تستشيره..وتاخذ برايه..

باسل..

مشاعره كانت متخربطه اكيد..

التغيير الي صار بهاديه.. رابكه..مو عارف شيسوي..

ما كان قاصد ان الامور توصل لي هالدرجه..

اهو حط روحه في موقف ومو قادر يطلع منه..

يبي مرته وبيته وعياله..

وبنفس الوقت متورط مع الي معاه..

ويفكر انه مالها ذنب يظلمها معاهم..

وعلى كثر ما اهو تعبان من محاوله العدل بين البيتين..

الا انه بينه وبين نفسه عاجبه دور هارون الرشيد..

فاتح هاديه بانه يردون لبعض بما ان العلاقه الي بينهم ما يقدرون ينهونها .. حتى بظل الطلاق..

ما قدر ينهي الي في قلبه لها ..

اهو تغير..بطريقته واسلوبه..

في بدايه زواجه..من الثانيه..ما كان يطل عليهم الا وين وين..

كان فاقد الاهتمام بالبيت والعيال وهاديه..لا مبالاه وآخر همه اهم..

من بدت هاديه الشغل.. وتعرفها على صديقاتها ونفسيتها الي بتحسن مستمر..

محلوه بعينه..اسلوبها وطريقتها..معاه ومع غيره..

روحها المرحه الي تذكره فيها اول ما عرفها..

كل ما يبي يرد بيته الثاني يحس بغمته واهو طالع من البيت لان بيهدهم..

الوجود معاهم متعه..فاقدها.. ومتحسر عليها..

يشوف عياله شلون يكلمون امهم .. ضحكهم وغشمرتهم..

وشلون قربو من بعض اكثر..

هاديه..

شاغله باله حتى واهيا مو موجوده..

يحاتيها ويفكر فيها..

هل معقوله رد الحب؟؟ او تجدد وانتعش؟؟ هل قرار وتنفيذ الابتعاد عنهم كان السبب بالوله والشوق لهم؟؟..

محتار بطبيعه العلاقه الي بينه وبين هاديه..

المعروف عن المطلقين.. المشاكل والتصادم ..عند الاهل وحتى بالمحاكم وغيرها..

هاديه..كلش ما اذته ولا ضايقته..

بالعكس بالمحكمه.. بروحها تنازلت عن كل شي..

ما يدري ليش يذكر نظرتها..جنها تودع انسان بيموت ..يوم سألها القاضي.. ما تبي تطالب بأي شي..

يوم سألها قالت.. حبي وقلبي وحياتي وسنيني وابو بيتي راحوو..

تبيني ادور على الفلوس؟؟ وصخ الدنيا؟؟ محد بيعوضني الي راح مني..

ما هزته هالكلمه كثر ما اهيا مأثره فيه الحين..

والي يهزه اكثر كلمه سمعها..

لو هاديه..

تتزوج..

شنو مصير هالبيت..

شنو مصيره؟؟





يتبع...

مهما تعبت فى بعدك تعبي فى قربك اصعب ..

تغلف الضحكه بوشاح من الحزن الاسود..

عندما تتحول المشاعر لجبال ثلجيه..مهدده بانهيار..

لما يكون اللقاء عذاب متعب لا يطاق..

لما يكون القرب استنزاف للوقت والاحساس والمشاعر..

لما بكون الانتظار والصبر اصعب وامر من البعد نفسه..

لما تكون الحياه مشروخه..كلها شقوق..

وانت مهمتك ترقع الشق..تردم الشرخ..

وكل ما تنتهي من شق ينفتح لك ثاني..

تكبر الفجوه .. مره بعد مره..

تصل لمرحله ﺗﻌﺪﻳﻞ لا ترقيع ولا تبديل ولا تعديل ينفع..

ويتشوه العالم الجميل ..

جميل في بالك انت بس..

انت تشوفه جميل..

ويوم تصحى .. تشوفه على حقيقته..

مسخ.. مشوه عديم الملامح..

بلا حياه..بعيد كل البعد عن الجمال..

لا سبيل لانعاشه.. ولا تجميله..

هل البعد حل؟؟

الابتعاد لين تهدى النفوس..

وغربله الوضع .. والاشخاص..

لتصفيه الذهن؟؟

ابدا مو هروب..

استراحه محارب..

لسيطره على انفعالات وتصرفات وردود افعال..

سؤال:

ليش في البعد يكونون اجمل؟؟وحبهم اقوى؟؟والرحيل لك ولهم افضل؟؟

إلى الوالد القائد..

صاحب السمو امير البلاد الوالد القائد..

شكرا.. شكرا... شكرااا

هاديه وباسل..3

ودعتهم بابتسامه...

وقامت تشرف على الخدم لترتيب البيت بعد عاصفه حفله عيد الميلاد الي فاجئوها فيها..

تاخذ شاور دافي سريع..

تنسحب لفراشها البارد..

وتلتفت صوب مكانه في السرير ..

تلمس مخدته..

تهمس لها..

فاقدته مثلي؟؟!

ثلاث سنين ما نام في فراشه..

ما دش هالغرفه..

يدش البيت مثل ..غريب..

تذكر كلامه يوم المواجهه..

باسل: انا غريب.. غريب في بيتي.. انتي وعيالج.. بعالم..وانا محد يمي ولا يحس فيني..

ما لقيت الاهتمام في بيتي... لقيته معاها باهتمامها..بتواضعها..انسانه على طبيعتها..

مو تمثال رخام..بارد ما عنده احساس ولا مشاعر...

انا غريب وانتي السبب...لا تلوميني..

هذي مو نزوه...مثل الي اكتشفتيها قبل سنتين... ولا غلطه..مثل الي صارت قبل سنه..

هذا قرار..اتخذته.. ولو احد فينا غلطان

فهو انتي..

صدمتها خلتها تتحول فعلا لتمثال رخام..

كانت تبي تصرخ تبجي تسب وتلعن ..

كانت بركان ثاير ..

بس ما قدرت تعبر..

كانت بتقوله انت الي شكلتني على ما انا عليه..

انت بيدك وبرودك خليتني الشخص الي انت نفسك تذمرت منه الحين..

مع العلم ان عمرك ما شكيت..ولا حتى علقت على اي تصرف او معامله ..

اصلا كنت تبارك اي قرار او خطوه او تصرف اسويه بالبيت او اليهال او الخدم او حتى مع الاهل..

اكتشفت خيانته مرتين..

بكل مره سكتت ولا واجهته .. وتصرفت بهدوء وصبر..

نزلت من مستواها وكلمت غريمتها الاولى..وهددتها..وابعدتها عن طريجه بهدوء..

وبالمره الثانيه كان كافي بس ظهورها بالصوره عشان تنهي علاقته مع زميله العمل..

بدون لا تواجهه او تصارحه بمعرفتها لخيانته..

ولا تحسسه بفرق بالمعامله او بتغيير بنمط الحياه الي عايشينه..

متحمله مسئوليه بيتها وعيالها وخدمها..

ومع هذا يحملها مسئوليه خيانته لها وللمره الثالثه..

سكتت..

سكوتها طال..

اخذ سكوتها من محمل موافقه على خطوته..

بس سكوتها كان مراجعه لافكارها وحساباتها وتصرفاتها..

باسل طعنها ..غدر فيها بعد 17 سنه زواج..بالوقت الي تحتاج لظهر تستند عليه..طعنها بانوثتها وكرامتها..خانها وتوج الخيانه بزواج شرعي..

انتقل لبيته الثاني بكل هدوء.. وطلب من هاديه عدم اعلان زواجه الا بالوقت الي يقولها عليه.. ونفذت..

هل هالهدوء راح يدوم؟؟

يتبع..

ندمانه..

انا سبتك وانت مني
ندمانه للنهارده
لو حتى غصب عني
ما كنش لازم ارضى
انا بتطمن عليك
وانا من بعيد لبعيد
بخاف لو رحت ليك
الاقيك حبيت جديد
مش من حقي العتاب
مانا سبتك للعذاب
لكن ربي اللي عالم
اخلاصي و حبي ليك
انا حبعد عنك وانا وياك قلبي
هتحمل تعبي
بعدك الله يعيني
لو صدفة قبلتك صبرني ياربي
لا يبان لك حبي
وانت قريب مني
حاولت انا اداري حبك
و اضحك على روحي و انسى
صورتك ما غابتش عني
شايلاك في قلبي لسه
الليل عليا طال
وانا بسأل نفسي ليه
بخبي حنيني ليك
ولا بقدر يوم عليه
يمكن جنيت عليك
بس انت الله يجازيك
خليتني عايشة عمري
علشان بعيشة ليك

ما نسينا...ولا بننسى..

هاديه وباسل..2

هدووووووووي...

فزت من مكانها.. تناديها داليا وين رحتي؟؟ صارلي ساعه اكلمج..

make a wish طفي الشمووع..

تطالعهم بنظره استغراب.. منو هذيل؟؟..تعصر مخها وتحاول اتذكر الويوه...حاله فقدان ذاكره وقتي..

فجأه ترد ذاكرتها..وتزاحمها المعلومات دفعه وحده..تردها للواقع..اهيا مو هناك.. اهيا هني.. في بيتهاا.. مع رفيجاتها تحتفل.. بعيد ميلادها 39...

تبتسم.. تشوف التسائل الي على ويوهم..آه بس لو تدرون وين رحت..وبمنو سرحت..

لو تدرون شكنت افكر فيه..

تتسع ابتسامتها.. كل وحده منهم دشت بحياتها باوقات مختلفه.. كل وحده فيهم عندها راي في باسل..

الي بتعصب ليش ذكرته والي راح تتفهم .. ولي بتستنكر..ولي بتستغرب..

كل وحده فيهم لها معزه خاصه بقلبها..

وبصمه ووقفه مشرفه معاها في مراحل ازمتها مع باسل..

ترد تسرح..

باسل..

رجل..مريح الملامح.. طفولي النظره..

صوته هادي مثل اطباعه..

له هيبه وشكله وقور..

اكبر اخوانه .. اربع شباب وبنتين.. متحمل مسئوليه البيت..من سن صغير..بسبب وفاه الاب..

هالشي مخلي شكله اكبر من سنين عمره .. ويمكن الضغوط خلته اكبر..بشخصه واسلوبه..

تتذكر زيارتهم بالتحرير لهم في مصر..

الزياره الي غيرت عالمها..

ما كانت مجرد زياره.. كانت خطبه..مع ان الوقت ما كان مناسب..

شلون امها الحازمه بقراراتها رفضت مجرد مناقشه الموضوع الا بالكويت وبوجود اخوها وحضور اهلها..

شلون تقبلوا اهله موقف امها..وشلون حددو موعد ردتهم مع بعض..

ردو الكويت..رجعو وكلهم امل وحب وشوق..مثل الحلم..

بلون الاسود.. بغيوم دخان الابار المحترقه.. استقبلتهم الكويت..

مشاعر الفرحه بالرده.. والحزن على الحال والي صار..

ومناظر لي الحين محفوره بمخيلتهم وما ينسونها..

شلون ننسى؟؟ الي صار ماينسي ولا ينمحي..

بس الحياه تمشي.. دارت الايام ..ودقت ام باسل وحددت موعد..

حلمها الوردي.. ما تحقق بحذافيره..اهلها واهله في منهم الشهيد والاسير..

واحتراما لمشاعر الاهل .. ما صار عرس ولا مظاهر احتفال..

وبدت الحياه الزوجيه في بيت حمولتها..مع قراره بالتفرغ التام له..وتفضيله انها ما تكمل دراستها..وافقت..

مع مرورالايام..

انصدمت..

من بروده باسل..

كانت تفكر.. هل كان حماسها زايد؟؟ هل كانت توقعاتها اهيا سبب خيبه املها؟؟

الاكيد انه يحبها..وفي احساس يكنه لها..

بس باسل مو من النوع الي يعبرعن مشاعره..واكتشفت ان الكل في بيتهم نفس الاطباع..

بدت بالتعامل بالمثل يمكن يحسون ان هالشي يضايق..ومع الايام تشربت هاديه اطباعهم.. وصارت نسخه منهم..

يمكن لان من عاشر القوم صار منهم..

جم شهر وبانت بشاير ولي العهد..بنفس البرود تقبلو الخبر .. وبنفس البرود استقبلوه.."خلادين"..

عقبها بسنه..استقبلو "حمادين" بنفس الطريقه..

مشت ايام وسنين روتينيه..بارده جامده..

الي يشوفها من بره ما يقدر مدى الجمود الي عايشين فيه..

حياتهم ماشيه بالقلم والمسطره.. وكل شي متوقع من قبل لا يصير..

وللامانه.. هاديه..ربه بيت استقراطيه من الدرجه الاولى.. من بيت اهلها وزاد عليها بيت حمولتها..

بيتها من كثر ترتيبه يحسسك انك في فندق خمس نجوم..

اسلوب الحياه نفسه..كل شي لازم يكون بمكانه المحدد..بوقت محدد..او عواقب وخيمه..

تحولت نبرتها الرقيقه لاوامر..للخدم ..لحمود وخلود..اوامر عسكريه ..تفرض هيبتها وتخلي الكل يلتزم فيها..

انقادت للحياه الي نفرضت عليها بدون لا تحس.. وللامانه عمر باسل ما قصر بحقها ولا حق عيالها..

الحياه بكل رفاهيتها..كانت تحت امرها..عمرها ما تطلبت..الي ما يوفره اهو من نفسه اهيا قادره عليه..ماديا..وتوفره..

ومثل اي علاقه زوجيه.. فيها جزر ومد..

لين في يوم ما تنساه..

بدايه مأساه.. بدايه غصه..

الاحساس بتسلل شخص لحياه باسل..مجرد احساس وافكار..ماكانت لاقيه دليل ..

وشغلت كل حواسها ..لمعرفه الدخيل..والبحث عن الدليل..

ولقته..

يتبع..

هاديه وباسل..

هاديه..انسانه هاديه..

مرحه ..والابتسامه ما تفارقها..مثل نظره الحزن الي في عيونها..

امرأة .. قلبها قلب طفل..بعمر ال39 تحتفل..

مع صديقات من عمر .. ومع المعارف الي بس من فتره بسيطه عرفتهم..

تتأملهم.. كل وحده منهم لها معاها موقف.. شلون قدرت تيمعهم مع بعض ..على رغم اختلافهم بالعمر والوضع الاجتماعي والثقافي؟؟..

تبتسم...

تدور عيونها بينهم .. تدوره...

اهيا عارفه انها ما راح تلاقيه .. كالعاده الي استحدثها بحياتهم من 3 سنين..

معقوله مرو 3 سنين؟؟

تسرح...

اتذكر..

اول مره شافته..

كانت 18..توها توصل الفندق..اليوم عرس اخوها .. حدها تاخرت بالصالون..تنزل من سياره..وتقول لسايق لا يروح..

ولااا تسمع صوت يناديهاا..

هدوووووووي...

تلتفت.. مناير وهدايه..(خوات ورفيجاتها بالمدرسه علاقتهم حيل قويه فيها..خاصه وان اصل امهم مصري مثل امها..و وايد اشياء مشتركه بينهم).. توهم واصلين الفندق..

تسلم عليهم... ولا تشوفه..باسل..اخوهم العود..

يسأل مناير متى يمرهم عشان ياخذهم.. تنقز هاديه هدايه وتقولهاا.. انرد مع بعض.. مع السايق قوليله لا يمركم..

مالحقت هدايه تقوله.. راح.. ومناير مشت تسبقهم داخل..

ما تدري ليش صورته ما فارقتهااا طول الوقت.. مع ان ما وجه لها كلمه.. ولا حتى نظره..

وعلى كثر ما كانت متحمسه للعرس.. كانت تنطره يخلص عشان ترد تشوفه مره ثانيه..

اخيرا خلص العرس.. اخيرا راح تشوفه..

طلعت بره معاهم ..ولا تشوف اخوهم الاصغر عادل ياي ياخذهم..

تسلم عليهم وترد البيت مع امها والسايق..تفكر..ليش كانت متشوقه لشوفته؟؟ شنوالي فيه يربكها؟؟شلي فيه مسبب لها هالحيره؟؟..

نفضت هالافكار عنها.. ومشت بحياتها.. يومين وسافرو.. كعادتهم بالصيف..والي تاخروا فيها بسبب عرس اخوها..

نست كل شي عن باسل ..بمجرد الوصول للمكان الي تعشقه ..مصر..

الحياه كانت طبيعيه..لين يوم قعدت على ربكه بالبيت وبجي وصراخ..

شصاااير؟؟

غزوووو..

العراقيين دشو الكويت...

الكويت راحت..

انصدمت.. شنو الكويت راحت؟؟

اسبوعين بجي وتلفونات وتسأل عن الاهل منو الي كان مسافر ومنو الي موجود بالديره..

قررت هاديه انها تشتغل بالسفاره..مع شباب كويتيين ..منها تعرف اخبار اهلها ..ومنها تحس انها قاعده تسوي شي..لو بسيط للكويت..

مشت الايام بطيئه وصعبه عليها وعلى الكل..الي داخل والي خارج الكويت..

تحررت الديره..فرحه مو سايعه الكون..

بس هم الرده صعبه.. اهيا وامها بس الي بره الديره واخوها وزوجته بالكويت..

والاخبار مقطوعه..

لين بيوم.. اتصال هاتفي من مناير.. تقولها انهم بمصر.. وتبي العنوان عشان تزورها..

الفرحه مو سايعتها .. من 9 شهور مو شايفه احد من الكويت.. خبت الخدم والبيت كله..

ونطرت رفيجتها على نار..

شوي ولا توصل مناير..مع هدايه وامهم..

وباســـــل..

يتبع...

رجاء انتي مو اختي..

بصلب الموضوع..

انتي مو اختي.. انا ما ارضى على خواتي يدشون النت..

نظره سوداويه..لعقول متخلفه..رابيه على ثقافه مجتمع مشبع بالرجعيه ..

لو فكرنا فيها.. هالشخص باليوم الواحد يقول لفلان عمي.. خالي .. ولد عمي..لناس يشوفهم مره بحياته ويمكن ما اتكرر..ان شافهم اليوم ما راح يتذكرهم باجر.. بتخليص معامله.. بمراجعه.. بحادث.. بجمعيه.. باي مكان..ما بينهم معرفه.. ولا دارس اخلاقهم..بس يطلق عليهم هالالقاب من باب الذوق والاحترام..

بس مع جذي.. ما يقدريقول عن فلانه.. الي بينه وبينها احترام متبادل..يشوفها عضوة بمنتدى..مدونه من المدونات..يوزر ونك بموقع او برنامج ..اختي..يستنكف منها.. ما يشوفها ترقى للمستوى.. مو عشان شايف عليها شي..

بس لانه ما يرضى على اخته انها تدش النت..

نرد نفكر شوي..

شنو الي ما يرضاه؟؟

النت بسلبياته؟؟ المغازل .. التحرشات.. تشويه السمعه..

يا اخي انت نيتك شينه..

بكل مكان فيه الصالح والطالح..ودخول البنت للنت ما يقلل من اخلاقياتها..

اذا ما ترضى على خواتك يدشون النت..وانت بنفس الوقت تدشه..فانت شي من اثنين.. يا انت نفسك مريضه.. انت تمنعهم لانك انت نفسك تستخدمه غلط.. وعبالك كل الناس مثلك.. او عندك مشكله وشك وعدم ثقه باهلك..

الطبيعي انك تكون حريص..مو شكاك..عطهم الثقه واحرص عليهم..

بس انك تعم على كل البنات..S:

للاسف انت وغيرك .. تقدرون تقعدون و بكل فخر تقولون انا صاحب المدونه الفلانيه.. انا صاحب النك الفلاني..انا مشرف المنتدى العلاني..

جدام اهلك وربعك..

بس البنت ما تقدر تقول..

نظره مجتمع لها ما تسمح لها بهالشي مع انه مو غلط..

شرط اكثر البنات..والاغلبيه.. ما يصارحون اهاليهم ..او ازواجهم.. انهم مدونات.. او منتمين للمنتدى الفلاني..او عندها نك بالموقع العلاني..
مو لغلط فيها..ولا لاحساسها بالذنب.. اهيا مو مسويه شي غلط.. بس لانها مو ضامنه رده الفعل..

ممكن.. الزوج او الاخ ..او حتى الاب يرفض هالشي.. وبنفس الوقت يمارسه بحريه..

ممكن يصدف انه معجب بافكار هالبنت المجهوله.. ويتفق معاها بآرائها..ويكن لها كل احترام وتقدير..

بس راح تقوم الدنيا وما راح تقعد اذا عرف ان بنته ..اخته..او زوجته اهيا نفسها المجهوله..

ليش .. شالسبب؟؟!

بالنسبه لي.. الكل اخواني غصب مو طيب..(بالانسانيه) Pp:

حتى لو انكر اهو هالشي.. اعترافي انا بهالشي لاحترامي لنفسي اولا..ومن باب الذوق واللياقه ثانيا..وعناد على الي مو عاجبه ثالثا..

رجاء انتي مو اختي..

ما راح تهزني هالكلمه..

بس..

كل الي بسويه..


احمد ربي انك مو اخوي من امي وابوي ..


:)

ما يسوى..

شلون هنت عليها..

شلون هانت علي..

صار لنا جم يوم.. لا ليلي ليل ولا نهاري نهار..واهيا بعد..


مزعلتني ومزعلتها.. ما فينا وحده تطالع بويه الثانيه..

ندري الدموع راح تغرق ويوهنا..


انكابر اهيا وانا..

اهيا معاها حق.. وانا فاهمه شعورها..بس هم انا معاي حق..واهي مو راضيه تفهم موقفي..

حاولت اكلمها .. اجرحتني.. جان اضرب انا على الجرح والوتر الحساس..


اعلنت الحرب..

لا انا ولا اهيا انكلم بعض.. وانتحاشى بعض..

انحرمت من صباح الخير يا روح روحي..
روحي الله معاج ويوفقج دنيا وآخره..
ويعطيج العافيه حبيبه ماما..

قمت ما اقعد اذا اهيا موجوده..واطلع اذا اهيا طلعت..

مو قساوه مني ولا جحد او عقوق..

اهيا تدري بحبها مالكني..اشهق باسمها واحلف بحياتها..ماكو شي يساوي غلاتها بقلبي..

علاقتنا وايد حلوه وانا واهيا حيل قراب.. من عقب وفاه الوالد الله يرحمه وانا متعلقه فيها..وناستي معاها..بسفراتي بطلعاتي..حتى بنقاشاتي..

بس هاليومين ازمتنا الله يهديني وياها..:(

طبعي وايد شين واهيا تدري.. دلعي الماصخ..الي اهيا والوالد رحمه الله عليه سبب فيه..


ازْعَل وما ارضى..ازَعِل وما اعرف اراضي..واهيا تدري..

امس اشوفها اتحرش..وانا ساكته..قلبي يتقطع ودي اروح اقط روحي بحضنها..وابجي وارتاح..هاليومين وايد تعبت من حرب الصمت..


بس قلت لااا عشان تعرف ان هالمره جرحتني صج..

وهم عشان لا يتكرر نفس الموقف مره ثانيه..

ادري غلط..بس شسوي..كل مره كان النقاش ينتهي بهروب ..هالمره الهروب ما كان يرضيها..تبي تقطع عرج وتسيح دم..اهيا حدتني..:(


اليوم قعدت من النوم على كوابيس.. من بدت حربي معاها وانا ما ذقت هني النوم..

توقعت يوم تعيس يديد..بطلت باب غرفتي..مشيت بالممر..لقيتها قاعده ناطرتني...

شافتني قعدت ولا تطلب مولاتي المبجله الريوق..وبصوت كله دلع وحنان ونعومه.."شوفي كوربس شتاكل يا فتحيه"..فديت هالصوت وراعيته..

بققت عيوني ...صج الي قاعده اسمعه؟؟ طلع اسمي؟؟....كوربس طبعا.. مو فتحيه..

قلت لاااا رضت الحب واليوم الي كنت اظنه ما راح يعدي على خير..شكله خير..

دشيت الصاله.. وانا وارمه.. عاقده النونه..رافعه الحاجب..ما اتحاجى يعني زعلانه..واتقوم بنفسها تسنع السفره وتقولي "شتبين غدى حبيبه ماما؟؟شنو مشتهيه اسويلج اليوم؟؟.."

انزل راسي وما ارد..شقول اصلا ما ادري..مو فاهمه هل هذا هدوء ما قبل العاصفه؟؟ هدنه؟؟ ولا رضوخ؟؟..

ما بلعت الطعم.. قلت "ما راح ارد من الدوام مبجر عندي شغل انتو شوفو شنو تبون.. لا تسوون حسابي.. "هالكلام لفتحيه خانوم..

دشيت لبست وانا مليون فكره في بالي..انا صح؟؟ ولا غلط؟؟ موقفي اليوم صح؟؟

غلبني شيطان كبريائي.. وقالي .."ما عليه نطريها لين ترضخ..هذي حياتج..القرار قرارج..شلون تطالبين غيرج ان ما يرضخ لنفس الضغوط الي قاعد يمارسونها عليج.. وانتي نفسج ضعيفه؟؟.."

طلعت من داري وانا ناويه اني اكمل الحرب البارده..

لقيتها قاعده..نزلت راسي وقلت مع السلامه.. ومشيت..وصلت لي باب الصاله..

وانا امسك يده الباب..حسيت بنغزه بقلبي..افكارصعقت مخي وعصرتني..لو رديت ومالقيتها؟؟ او مر اليوم وانا ما رديت..اذا راح يكون هذا آخر لقاء بينا..هل ابيها تذكرني بهالشي؟؟بهالويه؟؟ بهالطريقه؟؟

هل اقدر انا اعيش وانا آخر مره مزعلتها مني؟؟.. وانا الي ما ارضى عليها ولا على زعلها واموت بالتراب الي تمشي عليه وادعي ان ربي ياخذ من عمري ويعطيها؟؟ شلون ازعلها؟؟.. مليون فكره بهالثواني مرت علي..

وارد.. اركض واقط روحي عليها واهيا تلمني وتقولي الله يوفقج حبيبه ماما ويحفظج..ديري بالج على الطريج..حافظج الله ..

هديتها وكل ما فيني يرجف..بالسياره دموعي ما وقفو لين دشيت المصافط..بس ارتحت..

نسيت كل شي..اليوم وايد حلوووو..الزعل ما يسوى..راح اترد تبطل الموضوع بتناقش واسكره بهدوء..

من غير عصبيه.. حتى لو تكرر الموقف...

ما فيني حيل ولا حابه اعيد الي صار علي وعليها..

هاليومين الي مروا هدوا حيلي..

فكرت..بفكره وحده بس..ما ابي اضيع لحظه معاها بهم وكدر او نكد..

احبج يا مااااماااااا والله يخليج ذخر فوق راسي..

حدث في مثل هذا اليوم...

وستبقى ذكراك خالده..




الله يرحمك ويغفر لك ..