ما نسينا...ولا بننسى..

هاديه وباسل..2

هدووووووووي...

فزت من مكانها.. تناديها داليا وين رحتي؟؟ صارلي ساعه اكلمج..

make a wish طفي الشمووع..

تطالعهم بنظره استغراب.. منو هذيل؟؟..تعصر مخها وتحاول اتذكر الويوه...حاله فقدان ذاكره وقتي..

فجأه ترد ذاكرتها..وتزاحمها المعلومات دفعه وحده..تردها للواقع..اهيا مو هناك.. اهيا هني.. في بيتهاا.. مع رفيجاتها تحتفل.. بعيد ميلادها 39...

تبتسم.. تشوف التسائل الي على ويوهم..آه بس لو تدرون وين رحت..وبمنو سرحت..

لو تدرون شكنت افكر فيه..

تتسع ابتسامتها.. كل وحده منهم دشت بحياتها باوقات مختلفه.. كل وحده فيهم عندها راي في باسل..

الي بتعصب ليش ذكرته والي راح تتفهم .. ولي بتستنكر..ولي بتستغرب..

كل وحده فيهم لها معزه خاصه بقلبها..

وبصمه ووقفه مشرفه معاها في مراحل ازمتها مع باسل..

ترد تسرح..

باسل..

رجل..مريح الملامح.. طفولي النظره..

صوته هادي مثل اطباعه..

له هيبه وشكله وقور..

اكبر اخوانه .. اربع شباب وبنتين.. متحمل مسئوليه البيت..من سن صغير..بسبب وفاه الاب..

هالشي مخلي شكله اكبر من سنين عمره .. ويمكن الضغوط خلته اكبر..بشخصه واسلوبه..

تتذكر زيارتهم بالتحرير لهم في مصر..

الزياره الي غيرت عالمها..

ما كانت مجرد زياره.. كانت خطبه..مع ان الوقت ما كان مناسب..

شلون امها الحازمه بقراراتها رفضت مجرد مناقشه الموضوع الا بالكويت وبوجود اخوها وحضور اهلها..

شلون تقبلوا اهله موقف امها..وشلون حددو موعد ردتهم مع بعض..

ردو الكويت..رجعو وكلهم امل وحب وشوق..مثل الحلم..

بلون الاسود.. بغيوم دخان الابار المحترقه.. استقبلتهم الكويت..

مشاعر الفرحه بالرده.. والحزن على الحال والي صار..

ومناظر لي الحين محفوره بمخيلتهم وما ينسونها..

شلون ننسى؟؟ الي صار ماينسي ولا ينمحي..

بس الحياه تمشي.. دارت الايام ..ودقت ام باسل وحددت موعد..

حلمها الوردي.. ما تحقق بحذافيره..اهلها واهله في منهم الشهيد والاسير..

واحتراما لمشاعر الاهل .. ما صار عرس ولا مظاهر احتفال..

وبدت الحياه الزوجيه في بيت حمولتها..مع قراره بالتفرغ التام له..وتفضيله انها ما تكمل دراستها..وافقت..

مع مرورالايام..

انصدمت..

من بروده باسل..

كانت تفكر.. هل كان حماسها زايد؟؟ هل كانت توقعاتها اهيا سبب خيبه املها؟؟

الاكيد انه يحبها..وفي احساس يكنه لها..

بس باسل مو من النوع الي يعبرعن مشاعره..واكتشفت ان الكل في بيتهم نفس الاطباع..

بدت بالتعامل بالمثل يمكن يحسون ان هالشي يضايق..ومع الايام تشربت هاديه اطباعهم.. وصارت نسخه منهم..

يمكن لان من عاشر القوم صار منهم..

جم شهر وبانت بشاير ولي العهد..بنفس البرود تقبلو الخبر .. وبنفس البرود استقبلوه.."خلادين"..

عقبها بسنه..استقبلو "حمادين" بنفس الطريقه..

مشت ايام وسنين روتينيه..بارده جامده..

الي يشوفها من بره ما يقدر مدى الجمود الي عايشين فيه..

حياتهم ماشيه بالقلم والمسطره.. وكل شي متوقع من قبل لا يصير..

وللامانه.. هاديه..ربه بيت استقراطيه من الدرجه الاولى.. من بيت اهلها وزاد عليها بيت حمولتها..

بيتها من كثر ترتيبه يحسسك انك في فندق خمس نجوم..

اسلوب الحياه نفسه..كل شي لازم يكون بمكانه المحدد..بوقت محدد..او عواقب وخيمه..

تحولت نبرتها الرقيقه لاوامر..للخدم ..لحمود وخلود..اوامر عسكريه ..تفرض هيبتها وتخلي الكل يلتزم فيها..

انقادت للحياه الي نفرضت عليها بدون لا تحس.. وللامانه عمر باسل ما قصر بحقها ولا حق عيالها..

الحياه بكل رفاهيتها..كانت تحت امرها..عمرها ما تطلبت..الي ما يوفره اهو من نفسه اهيا قادره عليه..ماديا..وتوفره..

ومثل اي علاقه زوجيه.. فيها جزر ومد..

لين في يوم ما تنساه..

بدايه مأساه.. بدايه غصه..

الاحساس بتسلل شخص لحياه باسل..مجرد احساس وافكار..ماكانت لاقيه دليل ..

وشغلت كل حواسها ..لمعرفه الدخيل..والبحث عن الدليل..

ولقته..

يتبع..

هاديه وباسل..

هاديه..انسانه هاديه..

مرحه ..والابتسامه ما تفارقها..مثل نظره الحزن الي في عيونها..

امرأة .. قلبها قلب طفل..بعمر ال39 تحتفل..

مع صديقات من عمر .. ومع المعارف الي بس من فتره بسيطه عرفتهم..

تتأملهم.. كل وحده منهم لها معاها موقف.. شلون قدرت تيمعهم مع بعض ..على رغم اختلافهم بالعمر والوضع الاجتماعي والثقافي؟؟..

تبتسم...

تدور عيونها بينهم .. تدوره...

اهيا عارفه انها ما راح تلاقيه .. كالعاده الي استحدثها بحياتهم من 3 سنين..

معقوله مرو 3 سنين؟؟

تسرح...

اتذكر..

اول مره شافته..

كانت 18..توها توصل الفندق..اليوم عرس اخوها .. حدها تاخرت بالصالون..تنزل من سياره..وتقول لسايق لا يروح..

ولااا تسمع صوت يناديهاا..

هدوووووووي...

تلتفت.. مناير وهدايه..(خوات ورفيجاتها بالمدرسه علاقتهم حيل قويه فيها..خاصه وان اصل امهم مصري مثل امها..و وايد اشياء مشتركه بينهم).. توهم واصلين الفندق..

تسلم عليهم... ولا تشوفه..باسل..اخوهم العود..

يسأل مناير متى يمرهم عشان ياخذهم.. تنقز هاديه هدايه وتقولهاا.. انرد مع بعض.. مع السايق قوليله لا يمركم..

مالحقت هدايه تقوله.. راح.. ومناير مشت تسبقهم داخل..

ما تدري ليش صورته ما فارقتهااا طول الوقت.. مع ان ما وجه لها كلمه.. ولا حتى نظره..

وعلى كثر ما كانت متحمسه للعرس.. كانت تنطره يخلص عشان ترد تشوفه مره ثانيه..

اخيرا خلص العرس.. اخيرا راح تشوفه..

طلعت بره معاهم ..ولا تشوف اخوهم الاصغر عادل ياي ياخذهم..

تسلم عليهم وترد البيت مع امها والسايق..تفكر..ليش كانت متشوقه لشوفته؟؟ شنوالي فيه يربكها؟؟شلي فيه مسبب لها هالحيره؟؟..

نفضت هالافكار عنها.. ومشت بحياتها.. يومين وسافرو.. كعادتهم بالصيف..والي تاخروا فيها بسبب عرس اخوها..

نست كل شي عن باسل ..بمجرد الوصول للمكان الي تعشقه ..مصر..

الحياه كانت طبيعيه..لين يوم قعدت على ربكه بالبيت وبجي وصراخ..

شصاااير؟؟

غزوووو..

العراقيين دشو الكويت...

الكويت راحت..

انصدمت.. شنو الكويت راحت؟؟

اسبوعين بجي وتلفونات وتسأل عن الاهل منو الي كان مسافر ومنو الي موجود بالديره..

قررت هاديه انها تشتغل بالسفاره..مع شباب كويتيين ..منها تعرف اخبار اهلها ..ومنها تحس انها قاعده تسوي شي..لو بسيط للكويت..

مشت الايام بطيئه وصعبه عليها وعلى الكل..الي داخل والي خارج الكويت..

تحررت الديره..فرحه مو سايعه الكون..

بس هم الرده صعبه.. اهيا وامها بس الي بره الديره واخوها وزوجته بالكويت..

والاخبار مقطوعه..

لين بيوم.. اتصال هاتفي من مناير.. تقولها انهم بمصر.. وتبي العنوان عشان تزورها..

الفرحه مو سايعتها .. من 9 شهور مو شايفه احد من الكويت.. خبت الخدم والبيت كله..

ونطرت رفيجتها على نار..

شوي ولا توصل مناير..مع هدايه وامهم..

وباســـــل..

يتبع...

رجاء انتي مو اختي..

بصلب الموضوع..

انتي مو اختي.. انا ما ارضى على خواتي يدشون النت..

نظره سوداويه..لعقول متخلفه..رابيه على ثقافه مجتمع مشبع بالرجعيه ..

لو فكرنا فيها.. هالشخص باليوم الواحد يقول لفلان عمي.. خالي .. ولد عمي..لناس يشوفهم مره بحياته ويمكن ما اتكرر..ان شافهم اليوم ما راح يتذكرهم باجر.. بتخليص معامله.. بمراجعه.. بحادث.. بجمعيه.. باي مكان..ما بينهم معرفه.. ولا دارس اخلاقهم..بس يطلق عليهم هالالقاب من باب الذوق والاحترام..

بس مع جذي.. ما يقدريقول عن فلانه.. الي بينه وبينها احترام متبادل..يشوفها عضوة بمنتدى..مدونه من المدونات..يوزر ونك بموقع او برنامج ..اختي..يستنكف منها.. ما يشوفها ترقى للمستوى.. مو عشان شايف عليها شي..

بس لانه ما يرضى على اخته انها تدش النت..

نرد نفكر شوي..

شنو الي ما يرضاه؟؟

النت بسلبياته؟؟ المغازل .. التحرشات.. تشويه السمعه..

يا اخي انت نيتك شينه..

بكل مكان فيه الصالح والطالح..ودخول البنت للنت ما يقلل من اخلاقياتها..

اذا ما ترضى على خواتك يدشون النت..وانت بنفس الوقت تدشه..فانت شي من اثنين.. يا انت نفسك مريضه.. انت تمنعهم لانك انت نفسك تستخدمه غلط.. وعبالك كل الناس مثلك.. او عندك مشكله وشك وعدم ثقه باهلك..

الطبيعي انك تكون حريص..مو شكاك..عطهم الثقه واحرص عليهم..

بس انك تعم على كل البنات..S:

للاسف انت وغيرك .. تقدرون تقعدون و بكل فخر تقولون انا صاحب المدونه الفلانيه.. انا صاحب النك الفلاني..انا مشرف المنتدى العلاني..

جدام اهلك وربعك..

بس البنت ما تقدر تقول..

نظره مجتمع لها ما تسمح لها بهالشي مع انه مو غلط..

شرط اكثر البنات..والاغلبيه.. ما يصارحون اهاليهم ..او ازواجهم.. انهم مدونات.. او منتمين للمنتدى الفلاني..او عندها نك بالموقع العلاني..
مو لغلط فيها..ولا لاحساسها بالذنب.. اهيا مو مسويه شي غلط.. بس لانها مو ضامنه رده الفعل..

ممكن.. الزوج او الاخ ..او حتى الاب يرفض هالشي.. وبنفس الوقت يمارسه بحريه..

ممكن يصدف انه معجب بافكار هالبنت المجهوله.. ويتفق معاها بآرائها..ويكن لها كل احترام وتقدير..

بس راح تقوم الدنيا وما راح تقعد اذا عرف ان بنته ..اخته..او زوجته اهيا نفسها المجهوله..

ليش .. شالسبب؟؟!

بالنسبه لي.. الكل اخواني غصب مو طيب..(بالانسانيه) Pp:

حتى لو انكر اهو هالشي.. اعترافي انا بهالشي لاحترامي لنفسي اولا..ومن باب الذوق واللياقه ثانيا..وعناد على الي مو عاجبه ثالثا..

رجاء انتي مو اختي..

ما راح تهزني هالكلمه..

بس..

كل الي بسويه..


احمد ربي انك مو اخوي من امي وابوي ..


:)

ما يسوى..

شلون هنت عليها..

شلون هانت علي..

صار لنا جم يوم.. لا ليلي ليل ولا نهاري نهار..واهيا بعد..


مزعلتني ومزعلتها.. ما فينا وحده تطالع بويه الثانيه..

ندري الدموع راح تغرق ويوهنا..


انكابر اهيا وانا..

اهيا معاها حق.. وانا فاهمه شعورها..بس هم انا معاي حق..واهي مو راضيه تفهم موقفي..

حاولت اكلمها .. اجرحتني.. جان اضرب انا على الجرح والوتر الحساس..


اعلنت الحرب..

لا انا ولا اهيا انكلم بعض.. وانتحاشى بعض..

انحرمت من صباح الخير يا روح روحي..
روحي الله معاج ويوفقج دنيا وآخره..
ويعطيج العافيه حبيبه ماما..

قمت ما اقعد اذا اهيا موجوده..واطلع اذا اهيا طلعت..

مو قساوه مني ولا جحد او عقوق..

اهيا تدري بحبها مالكني..اشهق باسمها واحلف بحياتها..ماكو شي يساوي غلاتها بقلبي..

علاقتنا وايد حلوه وانا واهيا حيل قراب.. من عقب وفاه الوالد الله يرحمه وانا متعلقه فيها..وناستي معاها..بسفراتي بطلعاتي..حتى بنقاشاتي..

بس هاليومين ازمتنا الله يهديني وياها..:(

طبعي وايد شين واهيا تدري.. دلعي الماصخ..الي اهيا والوالد رحمه الله عليه سبب فيه..


ازْعَل وما ارضى..ازَعِل وما اعرف اراضي..واهيا تدري..

امس اشوفها اتحرش..وانا ساكته..قلبي يتقطع ودي اروح اقط روحي بحضنها..وابجي وارتاح..هاليومين وايد تعبت من حرب الصمت..


بس قلت لااا عشان تعرف ان هالمره جرحتني صج..

وهم عشان لا يتكرر نفس الموقف مره ثانيه..

ادري غلط..بس شسوي..كل مره كان النقاش ينتهي بهروب ..هالمره الهروب ما كان يرضيها..تبي تقطع عرج وتسيح دم..اهيا حدتني..:(


اليوم قعدت من النوم على كوابيس.. من بدت حربي معاها وانا ما ذقت هني النوم..

توقعت يوم تعيس يديد..بطلت باب غرفتي..مشيت بالممر..لقيتها قاعده ناطرتني...

شافتني قعدت ولا تطلب مولاتي المبجله الريوق..وبصوت كله دلع وحنان ونعومه.."شوفي كوربس شتاكل يا فتحيه"..فديت هالصوت وراعيته..

بققت عيوني ...صج الي قاعده اسمعه؟؟ طلع اسمي؟؟....كوربس طبعا.. مو فتحيه..

قلت لاااا رضت الحب واليوم الي كنت اظنه ما راح يعدي على خير..شكله خير..

دشيت الصاله.. وانا وارمه.. عاقده النونه..رافعه الحاجب..ما اتحاجى يعني زعلانه..واتقوم بنفسها تسنع السفره وتقولي "شتبين غدى حبيبه ماما؟؟شنو مشتهيه اسويلج اليوم؟؟.."

انزل راسي وما ارد..شقول اصلا ما ادري..مو فاهمه هل هذا هدوء ما قبل العاصفه؟؟ هدنه؟؟ ولا رضوخ؟؟..

ما بلعت الطعم.. قلت "ما راح ارد من الدوام مبجر عندي شغل انتو شوفو شنو تبون.. لا تسوون حسابي.. "هالكلام لفتحيه خانوم..

دشيت لبست وانا مليون فكره في بالي..انا صح؟؟ ولا غلط؟؟ موقفي اليوم صح؟؟

غلبني شيطان كبريائي.. وقالي .."ما عليه نطريها لين ترضخ..هذي حياتج..القرار قرارج..شلون تطالبين غيرج ان ما يرضخ لنفس الضغوط الي قاعد يمارسونها عليج.. وانتي نفسج ضعيفه؟؟.."

طلعت من داري وانا ناويه اني اكمل الحرب البارده..

لقيتها قاعده..نزلت راسي وقلت مع السلامه.. ومشيت..وصلت لي باب الصاله..

وانا امسك يده الباب..حسيت بنغزه بقلبي..افكارصعقت مخي وعصرتني..لو رديت ومالقيتها؟؟ او مر اليوم وانا ما رديت..اذا راح يكون هذا آخر لقاء بينا..هل ابيها تذكرني بهالشي؟؟بهالويه؟؟ بهالطريقه؟؟

هل اقدر انا اعيش وانا آخر مره مزعلتها مني؟؟.. وانا الي ما ارضى عليها ولا على زعلها واموت بالتراب الي تمشي عليه وادعي ان ربي ياخذ من عمري ويعطيها؟؟ شلون ازعلها؟؟.. مليون فكره بهالثواني مرت علي..

وارد.. اركض واقط روحي عليها واهيا تلمني وتقولي الله يوفقج حبيبه ماما ويحفظج..ديري بالج على الطريج..حافظج الله ..

هديتها وكل ما فيني يرجف..بالسياره دموعي ما وقفو لين دشيت المصافط..بس ارتحت..

نسيت كل شي..اليوم وايد حلوووو..الزعل ما يسوى..راح اترد تبطل الموضوع بتناقش واسكره بهدوء..

من غير عصبيه.. حتى لو تكرر الموقف...

ما فيني حيل ولا حابه اعيد الي صار علي وعليها..

هاليومين الي مروا هدوا حيلي..

فكرت..بفكره وحده بس..ما ابي اضيع لحظه معاها بهم وكدر او نكد..

احبج يا مااااماااااا والله يخليج ذخر فوق راسي..

حدث في مثل هذا اليوم...

وستبقى ذكراك خالده..




الله يرحمك ويغفر لك ..

لمني بشوق واحضني..

تضيق الدنيا فيها.. اتبعثر..يختنق صدرها بانفاسها من غصه..تهدد عينها بمطر ..من لهب ونار..


اتذكر الي راح..تحرقها الذكرى مع بروده الوحده.. والعطش ..

لاذن تسمع..ولايد تنمد..بحب..تفتح لها باب.. لقلب..يستقبلها ..ويبدد الهموم والالم..ويداوي جرح الفراق.. ضمى الشوق ..وحنين الوله..

مثل ما قلت قبل.. التعبيرعن الحب اهم من الحب نفسه..

الاحتياج للحضن..

هالحركه ورده الفعل هذي .. لها سحرها في القلب والعقل .. وسيلة سريعه لتوصيل المشاعر..والاحتفاظ بالود والحب ..

مهما كان نوع الحب..او نوع الفقد..(العاطفه من الامومه والابوه..الصداقه والانس..الخ)

بالنسبه لي اشوف في هالحركه.. الامان..

احس.. انها مرتاحه ..تدري ان في احد تعتمد عليه..ظهر يحميها .. يرعاها.. يهتم فيها ويصونها..

ليش ؟؟

ما ادري..يمكن من طريقه الحضن؟؟الي تحسس بالاحتواء..

كل واحد منا محتاج للحضن الي ينسيه همومه..يريحه ويشيل عنه..

السؤال يقول..

شنو تعنيلك هالحركه؟؟

هل كنت بيوم الحضن الدافي ؟؟ الي سمع هموم غيره.. وخفف عنهم؟؟

كان صدرك وسيع وتحملت ؟؟ كنت مرسى الامان؟؟

شنو شعورك وانت الحاضن او المحضون؟؟

شتفضل انك تكون؟ المرسى والمينا؟؟ ولا المركب والسفينه؟

من صجه؟؟

طول عمري مالي شغل..

لا بسياسه .. ولا غيرهااا...

اشوف واسكت.. يمكن اعلق..بس بالاغلب اظل ساكته..مو عشان شي..بس اقول اهل مكه ادرى بشعابها .. وعط الخبز خبازه لو اكل نصه..

ياما قريت مقالات .. من كتاب.. وشيوخ دين .. ونواب...

بس الي قريته اليوم بالوطن شي يحر ...

يعني من صجه هذا ولا يتغشمر؟؟

كلمة صراحه....نبيل العوضي

"الدعوة التي اطلقها الدكتور عبدالمجيد الزنداني لفتح مراكز تدريب للمتطوعين في الدول العربية دعوة أراها تستحق التوقف فما المانع من ان يتم تدريب ملايين المتطوعين على حمل السلاح وقيادة الدبابات واستخدام المتفجرات والتدرب على اساليب القتال؟!ما المانع؟!.. أليست اسرائيل قد دربت شعبها كله للقتال؟! فلماذا حكوماتنا تمنعنا حتى من التعرف إلى الاسلحة واستخدامها، أليس الشرع يأمرنا بالاستعداد؟ ?وأعدوا لهم ما استطعتم من قوة ومن رباط الخيل ترهبون به عدو الله وعدوكم?، أليس الواقع يوجب علينا الاستعداد حتى لا يأتي الدور علينا إن لم نفكر في نصرة اخواننا في غزة؟!أرجو من مجلس الأمة الكويتي أن يطالب بهذا الأمر وليكن التجنيد جديا، والتدريب حقيقيا، وربما تحذو بقية الدول حذونا في هذا المطلب الشرعي."

نستعد؟؟ لشنو بالضبط؟؟ يوم الغزو كان في تجنيد .. هل فاد هالشي؟؟ الا قله قليله؟؟

وفوق كل هذا.. النواب نفسهم وافقو وبالاجماع على الغاء التجنيد الالزامي من 2001 ..ومن الاسباب الغائه عدم التزام المجندين ..ينحاشون من التجنيد..وبتالي انزلت عليهم احكام منع السفر والضبط والاحضار وحتى الغرامه ما كانو يدفعونها.. تبيهم يطالبون ويقرونه الحين؟؟

انت تضمن ان المتطوعين الي راح تعطيهم كورس مكثف باستخدام الاسلحه والمتفجرات والتفخيخ.. ما يتحولون لارهابيين؟؟.. ولا انت ولهان على المناظر الي شفناها 2005 «كتائب الحرمين» بام الهيمان والسالميه ومبارك الكبير؟؟

ناقصين مينن ما يعرفون كوعهم من بوعهم بالدين والجهاد.. ينقص عليهم بحور العين ..ثاني يوم مفجرين الافينيوز ولا المرينا على بو انها بؤره فساد وانحلال ..

ويصير الطريق الى نصرة غزه عن طريق المجمعات؟؟

مقالتك كلهااا من اول حرف لي آخره قاثتني.. خاصه الي فيها نقض المعاهده..وانا ما اعتقد انها من اخلاق لا الاسلام ولا المسلمين..

حسافه على اشرطتك قبل.. القابضات على الجمر.. ونسائم رمضان..

هالشي مو لك..مثل ما السياسه مو لي..

ويمكن فاهمه الامور غلط..

بس في سؤال حيل محيرني...ليش الي يقول للناس جاهدو .. ما يبدي بروحه ويروح يجاهد.. يمكن يصير عبره لمن لا يعتبر؟؟!



آسفه على التعليق..

بس كلمه كانت بخاطري وقلتها..

حسافتج يا كويت :(

**تحديث**

خطاك السوو حسافتج يا كويت = مبيوق

******************

تمت إزالة المدونة

معذرة، تمت إزالة المدونة الموجودة في 7asaftech-ya-kuwait.blogspot.com . لم يعد هذا العنوان متاحًا لمدونات جديدة.

ليييييييييييييييييييييييييييييييييييييييش؟؟

هل السبب بوم بو مبارك؟

06 يناير، 2009

بوم بو مبارك

الكويت سنة 1906
بو مبارك.. رجل من رجال الكويت الأخيار ونوخذة من الطراز الأول أحب بحريتة وأحبوه.. كان لدية بوم كبير يعد من أكبر أبوام الخليج وانشطها تنقلا بين الكويت والهند وزنجبار
.. وكان لدية من الأبناء الكثير وكلهم يعملون لدية في هذا البوم
وكان تجار الكويت يعتمدون علية إعتماد كلي بالتجارة ونقل البضائع وثقتهم به بلا حدود
مرض بو مبارك وأعطى حق الإدارة لإبنة الكبير مبارك وأصبح هو النوخذا
إلى أن مات بو مبارك.. واستلم مبارك زمام الأمور
ولأن مبارك ايضا كان كبير بالسن عندما مسك إدارة البوم وشؤونة.. فلم يعيرها اهتمام كبير .. فقد كان مبارك يحب السفر والقنص والحداق
لذى فقد عين مبارك أحد اقربائة نوخذا على البوم وتفرغ هو للحداق والقنص ولحل المشاكل الكبيرة
لقد عين مبارك رجل يدعى محمد وهو إبن عم مبارك.. فقد كان متعلم يتكلم ثلاث لغات هي العربية والهندية والزنجبارية
واصبح محمد هو النوخذا للبوم الكبير
وأعلن ذلك بالكويت كلها ونودي بالناس أن إجهزوا للدخول للبحر (الدشه)
وفعلا اختار النوخذا بحريتة ولم يحسن الإختيار لقلة الخبرة ..
ودخل النوخذا محمد البوم مبحرا قاصد الهند ومع تجارة اهل الكويت .. ولم يصل البوم إلى قطر حتى بدا الخلاف يدب بالبحرية
والنوخذا (مبقق عينة) مو مصدق
وجرت العادة بين النواخذا الكبار لا صارت مشكلة في نص البحر يتصرفون بحكمة ويجعمون البحرية واللي مو عاجبة يحبسونة بغرفة لين يوصلون البر وتحاسبون ساعتها
لكن نوخذانا محمد بعد ما بقق أعيونة وفج حلجة قرر أنة يرجع لإبن عنة العود وصاحب البوم مبارك وقولة ترى ذيلة البحرية اذوني
وفعلا رجع النوخذا للكويت والناس مذهولة من هذا التصرف وكلم مبارك ومبارك اصدر اوامرة بطرد بعض البحرية وقال لمحمد نقلك بحرية يدد وتوكل على الله.
وفعلا بدأ النوخذا بمشاوراتة وحدد يوم (الدشة) وطلع من الكويت قاصد الهند.. وطبعا زادت حمولة البوم من البضاعة ليش إنة في ناس عطوة بضاعة يديدة
وقبل وصولة البحرين بقليل صرخ احد البحرية وقال إنة انباق.. النوخذة (بقق عيونة )كالعادة وفج حلجة وتدودة حاول فيهم منو اللي باق محد تكلم.. وطبعا خاف على سمعتة وإن منصب النوخذا يروح منة وقال دامي قريب من الديرة برد
ورجع وشكى لمبارك الحال ولم يجد مبارك بديل غير طرد البحرية وتكليف النوخذا بختيار بحرية يدد!!
وتم ذلك وجاء ناس من الزبير وعطوا النوخذة بضاعة وقالولة دامك رايح الهند وصل بضاعتنا
وشد الرحال النوخذة
وبعد ما طلع من مضيق هرمز ودخل البحر العود اشتد الهوى على البوم وقال احد البحرية
يا نوخذا الهوا جايد وانا اخاف على البوم لا يطبع وحنا نموت
وقال النوخذا شتشور؟؟
قالة نقط بعض الحمولة .. مركبك له حد وانت اخذت اكثر من حموله البوم..وسبّه رجعاتك الكويت اللي مالها داعي والناس كل ما رديت عطوك شغلهم إلين تأخر شغل الناس وزادت الحمولة..
قالة النوخذة : تاكل تبن اقد حلال الناس؟؟
تبي مبارك يقول عني مو كفوا اصير نوخذا؟؟
وتخانق النوخذا مع البحار وانقسم البحارة قسمين
و(بقق اعيونة) نوخذانا وقرر يرجع وشوفلة حل مع بحريتة
ويوم إنة بين المحمل بدت الطنازة بالكويت ومن بعد ماكان محمل بو مبارك ينضرب فية المثل صار الناس أتطنز على تصرفات وضعف النوخذة
ودخل النوخذة محمد على مبارك ولكن مبارك كان رايح القنص وانجبر محمد ينطر مبارك لين يرد من السفر والقنص
وتعطلت مصالح الناس وبدت البضايع تخيس وهي على السيف
ورجع مبارك وقال لمحمد حمدالله على السلامة... متى وصلت من الهند؟؟ ولقيتلي البخور اللي طلبتة منك؟؟
وقالة طال عمرك .. ما وصلت الهند
قالة مبارك.. أفا ليش؟؟ بحريتك بعد؟؟
قال : إي نعم والله أنهم أذوني يا مبارك وشوفلك صرفة فيهم او اعفيني مابي اصير نوخذة
قال مبارك: من صجك أنت.. وأن شلتك من أحط غيرك؟؟ ماكو .. ماكو.ماكو.ماكو .ماكو.... أنت شايف الحال خلك وهالمرة أنا بنفشهم لك
وفعلا جدد مبارك ثقتة في محمد وخلاه نوخذة على اليوم واختار بحريتة للمرة الرابعة وقرر أن تكون الدشة باجر الفير
وقبل الدشة يالة طارش من مبارك يقولة إن في ناس وشيوخ بحطون بضاعتهم عندك يبونها توصل الهند
وقال محمد بس البوم مايشيل خل يشوفون غيري
ضحك المطراش على النوخذة محمد وقالة: اي غيرك يا نوخذا هو بقى بوم بالديرة ما سافر؟؟ ألحين تلاقيه جريب عمان رادين الكويت.
وقعد محمد يفكر شللي سواة .. إذا المطراش قعد يتطنز علي و أنا النوخذة..!!
قام النوخذا ولفز بيد المطراش عشر ربيات وقالة ابيك تشوفلي الناس شتقول وليش يصير فيني جذي؟؟
ويالة المطراش عقب يومين وقالة با عمي الناس ملت وأنا عرفت أن أخوان مبارك وأعيالة وأعيال عمة اللي هم أعيال عمك ان بعد هم اللي يوزون بحريتك عليك في كل مرة !!
وراح محمد يشتكيهم عند مبارك.. ولكن مبارك ما صدق وقالة اتشك في أهلك وتصدق المطراش؟؟
روح خذ محملك وبحريتك وكمل المشوار
وأخذ النوخذة البحرية اللي لقاهم العن من اللي قبلهم وبدأ أحد البحرية بناجر النوخذا وهم على السيف
لكن النوخذا قال يا معود مالي وي خل أكمل واللي فيها فيها
وراح النوخذا ويوم إنة وصل قبال سواحل الخفجي (طبعا كانت لنا) تعاونوا علية البحرية ليش إنة أخذ حمولة زايدة عن حدة والبوم ماقام يمشي سريع
وتناجر معاهم وقرر إنة يرجع الكويت وبس مايبي يصير نوخذة
ورجع وكلم مبارك
وقالة مبارك.. اسمع يا محمد غيرك ماني حاط.. وانا قاعد ارزك ابيك تصير عقبي تمسك الحلال ولا تفشلني.. اقعدلك شهر ريح بالديرة ونق بحريتك عدل وفرصة ياينا خطار من نيد وبعد ما يمشون الخطار توكل
وفعلا نطر شهر وحرك والناس شغلها وقف والبضايع اللي بالبوم خاست والمحمل زادت حمولتة وصار ثقيل ..
لكن باس قوي.. حرك محمد للمرة الخامسة
ويوم وصل البحرين. لقى تباشير سفر أهل الكويت رادة وخلصت رحلتهم
وقالولة البحرية يا نوخذة خلاص رد فينا فشلة الناس رادة وحنا طالعين تونا
قال ابد أكمل
وبعد ما وصلوا لين المحيط الهندي أتشد الهوى وزاد الموي وتخانق البحرية مع النوخذة وكل من يقول راية وزاد الموي أكثر ونقص شراع البوم وبلشو يشوفون الموت.. وقطوا حمولة البوم زحلال الناس بحر.. والدقل أنكسر وغرق الدليلة والنوخذة يطالع اللي صاير حوالية وهو (مبقق عيونة) مو مصدق مايدري شسوي
ووصل الخبر للكويت إن أكبر بوم بالكويت واللي فية حمولة أغلب أهل الكويت طبع !!
والناس بدت تصيح على اعيالها وخيرها اللي راح في محمل بومبارك
النهاية
هل سينجو النوخذة محمد والمحمل والبحرية؟؟
وإذا نجى مامصير النوخذة والمحمل والحمولة اللي انقطت؟؟
وشنو الحل بالكويت إذا ومصير تجارها واللي ناطرين المحمل؟؟
هذا اللي بنجاوب علية في الجزء الثاني من محمل بومبارك (إذا تبون جزء ثاني)

اعقلها وتوكل..

يا أبا الزهراء خذنا

للشاعر : الشيخ بشار العالي

الرادود : صالح الدرازي

يا أبا الزهراء خذنا نحن قاسينا سنينا

كيف لا يحلو على ثغري هواه
من ترى ملحمة النصر سواه
و هو من رب السماوات اجتباه

عجز الحبر .. و استحى الشعر .. من سنا طه
فارتمى دمعي .. فوق أوراقي .. كيف وشّاها

يسحق الركب إذا لاحت يداه
لا تلوموني فقد خارت قواه
بعت حبي و هو يا ناس اشتراه

أينها الشمس .. من سنا طه .. كي تحاديه
كيفما يأتي .. تسجد الأرض .. تحت رجليه

أنا من همٍ لهم أتراما
و الجوا كان الى صدري اماما
لستُ أدري يقتل الحرُّ على ما

نسي الليل .. ان لي بدرا .. ليس يخفيه
و صروفٌ لي .. منه قد لاحت .. نحن في فيه

تعصروا فالدارُ تسطوا فوق داري
فلكم عاثت يداها بقراري
هتكت حرمة بيتي و ستاري

قم لي يا طه .. كم تجرّعت .. غصّة غصّه
و المعاناة .. لم تخلي لي .. أيما فرصه

جراحي بساحي تشبُّ .. يا ناعي
فمالي خلاصٌ لأنجو .. من دائي
سواكم مجيرٌ يبثُّ .. أرزائي
سفينٌ هواكم و قلبي .. مينائي
سلوها فلا لم تواري .. أشلائي
و عنّي مرارا لتبني .. بيدائي

يا امامي لقد طال أوامي
و بجرحي نما سيف انكتامي
ان قلبي الى لقياك ظامي
فلتشُني بناري و ضرامي

كان قلبي شريكي في الأذيّه
يترامى على كل رزيّه
و يداه من الحزن دميّه
يتحنّى بشلال القضيّه

قلموه ظفر كسرى ان تمادى
و امسحوا دمعاً على خدي تهادى
و اذا قيل قفوا قولوا لماذا

نطق الصخر .. و مشى الحرُّ .. نحو آمالي
هكذا الصبر.. يسره عسر .. ما رعى حالي


تمادى الظلام و لاحت .. في صدري
همومي و صوتي يدوي .. من نحري

أنا لن أحيد و ربي .. عن صبري
و لكن سأحكي شجوني .. في شِعري

أنا إن قلت من يسمع صوتي
لو نطقت بحق لاحَ موتي
لا أبالي و لا ما فات فوتي

وحدة الصف بيانٌ لوفائي
لك يا طه و أصحاب الكساءِ
ما لنا مزّقنا ليلُ العناء

كلما ندري .. أننا شيعه .. و همُ سنه
يا له ضعفٌ .. يا له وهنٌ .. يا لها محنه

أيها المسلم سر نحو السعاده
و توخّى من مطبّات الاباده
قم من النوم و لا تبغي الوساده

انه العالم .. يرهب الوحدة .. ليس يبغيها
فهي أخطارٌ .. هددته كم .. كيف يحييها

قفوا يا رفاقي بخطٍ .. لا يُبلى
و قولوا سلاما لجهل .. ان ولّى
فشيعي و سني ذراعٌ .. ما شلا
لصف موحد نقولُ .. يا أهلا
فقوة و صحوة تنادي .. لا كلا
رفعنا بياناً بعزم .. ما فُلا

سترعبي العالم .. و تظفري ما لم .. تمزقي فوق رباكِ بشتات
توحدي هيّا .. و طاردي الغيّا .. فأنت اصرار و عزمٌ و ثبات
فالمسلم رفضٌ .. لكل اجرامٍ .. و هو موالاة لنور الظلمات
فالتفتحوا فتحاً .. ولتصبحوا كفّا .. تبايع الحقَّ برفض الكربات

أمة الله بالصف أبيه
إنها في الملمات قويّه
ترعب اليوم تلك الهمجيّه
و تقول بصبرٍ و رويّه
إن ديني هو اليوم هويّه
لا لشرقٍ و غربٍ يا أميّه
قد عقدنا عزومات عليّه
مسلمون و لا للطائفيّه

مع اعتذاري لحذف ابيات ما تتماشى مع مبدئي سالف الذكرعن حديث الرسول عليه الصلاه والسلام اعقلها وتوكل..وقصدي فيها مو ربطها عشان ما تنحاش..مثل ما الكل يطالب بهالشي ..لاا .. اني افكر فيه بعقل واقتناع.. واتوكل ..

من بديت اميز الصح من الغلط وانا متبعه هالمبدأ على طريقتي الخاصه..

وايد هاجموني قراب ..اغراب.. اي احد يتبطل جدامه موضوعي.. يهاجمون قناعاتي..

وبما اني بنت الرميثيه وحتى النخاع احب كل شي فيها.. طفولتي كانت هناك.. شطانتي بمدرستي برفيجاتي..

يفكرون ان على هالاساس ممكن اكون منحازه لشي انا ما اعترف فيه وهو الطائفيه..

انا ربيت في بيت سني حنبلي .. بس بنفس الوقت كان لنا حريه بلاختيار .. وعن قناعه..

بس ما يمنع هالشي معرفه ان الحلال بين والحرام بين..بس كان سؤال انتي شيعيه ولا سنيه يحسسني بالغرابه.. منو هذيل؟! وانا منو فيهم..

وبقناعتي قررت انا مسلمه..اشهد ان لا اله الا الله وان محمد رسول الله ومؤمنه باركان الاسلام والايمان..واحب اهل البيت وصحابه الرسول.. واقتدي فيهم..

ما كتبت هالموضوع عشان اقول انا صح وغيري غلط ومذهبي ومذهبهم..

بس يتني هالافكار هالايام هذي وانا اشوف التغمز والتلمز على ناس ..وناس ما تخلي احد في حاله..

النصيحه شي راقي اكيد وفيها اجر.. منو فينا ما يدور اجر ؟؟ واحنا كل يوم نجرم بحق روحنا باشياء وايد ..بقصد او بدونه.. ونركب روحنا آثام وذنوب..اكيد نبي اجر..

بس لجنه لكل شي وضغط وقيود باسم لجنه الثوابت والضوابط والعادات والتقاليد..اشوفها مالها معنى..

يعني شنو المطلوب؟؟ هل المفروض اني الغي عقليتي وتفكيري لمجرد ارضاء فئه معينه على حساب معتقداتي الي انا مقتنعه فيها؟؟ سواء صح كانت او غلط..

بس بالاخير محد بيتحاسب عني بقبري الا انا..

حريه العقيده بما انها ما تتعارض مع حريات الآخرين كفلها الدستور..التضييق على حرية الرأي والفكر يعتبر مخالفة واضحة للدستور، تنص المواد 35 و36 و37، التي تضمن حرية التعبير وتكفلها.."حافظتهم عشان استعملهم في بيتنا عند اللزوم"

فرض الوصاية على الناس مبدأ غلط ومرفوض ومحد يقبله.. ما يحق لأحد ان يقرر عن احد شنو يقرأ وشلون يفكر ..شنو يحب وشنو يكره..على اي اساس فئة معينة يكون لها الحق في فرض آرائها ومعتقداتها على غيرهم؟؟ ..

لو باخذ الامور بحسن نيه.. الخوف على امه محمد من الشتات والتفرقه وشعارات لا لها اول من آخر..

راح ارد اقول الدين نصيحه.. بس محتاجه فن لصياغتها عشان توصل الرساله الي بتقولها صح..

بس بهالاسلوب؟؟

اكثر من الي انا قلته لا تعليق..

العيد موللي مفارق زمانه..

العيد..

العيد باجر قلت انا العيد مابيه
العيد مو للي مفارق زمانه
تكفون حالي لاتقولون وش فيه
حالي عليل وسبته من زمانه
راح الذي بالحيل ياناس مغليه
اللي قصيدي وكل مملك عشانه
اللي أليا من ضاق صدري ألاقيه
الله مروع طيبته مع حنانه


لي هني وهالكلمات من ناحيتي مكتوبه بلسان حالتي..

هالشي مو من اليوم .. بس ما ادري ليش لما تمر على الواحد مناسبات المفروض انها سعيده انتذكر ذكرايات حزينه..

اقول هالشي يعني انا مو ناسيه وتذكرت..ما نسيت عشان اذكر... بس الوله ذبحني..

خصوصا بهالايام المفترجه على قولت ماماتي الله يحفظها.. اوله .. على ابوي الله يرحمه..

شكثر مشتاقه لشغلات ... الناس تسويها وانا محرومه منها...كلمه بسيطه معناها كبير للي فاقدينها مثلي...ابي اصرخ باعلى صوتي انادى يباااااااااا...ولهت على هالكلمه .. اخاف ينسى لساني شلون ينطقها... صدى صوتها بمسمعي غريب علي..

ابي اقعد باجر الصبح الاقيه قاعد كاشخ بغترته وعقاله وبيده مسباحه ناطر بالدوانيه..

ادش احب راسه وابوس ايده واعايده..

على ايامه الله يرحمه كان عيد الاضحى يوم مأساوي عندي.. كنت افزع من الفير.. الم الخرفان المساكين الي راح يضحون فيهم..

واتناجر مع ابوي.. اكلمه ودموعي على خدي..حرام عليك... لا تذبحهم.. عشاني...

يبتسم لي .. عيونه تضحك لي.. وما يرد علي..

ابيع عمري الي راح والي ياي عشان اشوف هالابتسامه ثواني..

اروح داري وانا زعلانه.. لانه ردني كالعاده وراحو خرفان العيد من جيس اهلهم..

انام من كثر ما بجيت على الخرفان.. واقوم ناسيه المذبحه الي صارت.. انزل الدوانيه واشوف اطيب قلب عرفته بحياتي..

قاعد ..عطره وبخوره يضرب انفاسي قبل لا اجبل عليه..

اقعد يمه ويلمني بحضنه ..راسي على صدره.. انسى الدنيا ومافيها...

الاحساس بالامان والحنان .. فاقدته ومحد بهالدنيا يقدر يعوضني عنه..

من راح ... وانا ما مر علي عيد.. راح العيد.. اذا رد اهوو بيرد عيدي معاه..

للي عندهم هالنعمه ومو حاسين فيها اقول..

لا تضيعون ثواني.. لا تتهاونون..

ما راح ترد وراح تتحسفون..

والله يرحمك يا اغلى من سكن قلبي ويغمد روحك الجنه..
انت وموتى المسلمين يا رب العالمين..

وكل عام وانتو بخير...

ودي انسى..

ودي انــــــــســـــــــى

ان قـلـبـي كـــان مــرســى ..

ترمي جروحك عليه .. كل ما مريت فيـه

بـعـدهـا تـرحــل وتـقـســى ..

ودي أنـــــــســــــــى ..!

شلون الواحد يقدر ينسى..

هالشي الي ودي وبخاطري اني اسويه...

ودي انام واقعد ناسيه ..

اشخاص .. اشياء.. اماكن..

ضايقتني..كدرتني او اذتني..

كل شخص تعمد هالشي او بدون قصد..

المشكله بطبعي ما انسى..

يمكن انسى امس شماكله .. متى قاعده..بس ما انسى منو كلمت وشقلت وشقال .. لا والمصيبه بالحرف الواحد..

وفوقه اتذكر الجو العام للموقف والمكان ..ريحته او العطر الي يميزه.. وشنو الاغنيه الي كنت اسمعها حزتها..

عشان لو راح عن بالي مجرد ما اشم نفس العطر او اسمع لحن هالاغنيه يرد يصحي كل شي.. جنه توه صاير الحين..

ويرد ينفتح الجرح الي ما برى اصلا.. وينزف ..دموع ودم.. انزين لي متى؟؟

اذكر في فتره .. حاولت اصير بطله.. اسوي مثل ما كل الناس تسوي.. شمعنا اهم ينسون وانا لأ؟؟

خلاص بلهي روحي .. اشغل نفسي.. ما راح اخلي لنفسي فرصه اعكر مزاجي..على شي راح وانتهى..

قررت..أعيش اليوم كله..بطوله وعرضه.. كان جدا مزحوم.. بمعنى وبدون معنى المهم ما ابي افكر ..

انتهى يومي على خير .. ويت لحظه الراحه.. يعني عقب يوم حافل .. المفروض والطبيعي شاور ونوم على طول .. صح؟؟

لاااااااا هذا للناس العاديه مو انا...

عقب الشاور.. واول ما دشيت فراشي..

دار في بالي فيلم ابيض واسود .. قصه حياتي من كان عمري 5 سنين..

كل كلمه اجرحتني وضايقتني.. كل موقف اسود عشته..كل شخص خذلني بيوم..كل توقعاتي الفاشله وكل الصدمات..

حتى لو تذكرت موقف حلو..ذكري ضحكتني..اتذكر شي يكدرني.. وينسف هالذكرى من بالي..

رفيجتي قالتلي هالحالات اتحوشها من تاثير اكتئاب الشتى.. تدرون هالحالات تحوش الواحد..

بس بس بالشتااا.. انا طول السنه هذي حالتي... والحل؟؟

في وايد ناس يعزوني طالبوني بفقدان ذاكره مؤقت..

انا عن نفسي تمنيت ان يكون للواحد كنترول على روحه.. مثل الكمبيوتر.. يشيل هذا ويحط ذاك ويمسح هذا ..واذا مل يفرمت الجهاز بكبره..

نداء لاصحاب القلوب الرحيمه..

أنا اريد حلا..

ليه تسأل؟

ليه تسال من خطا ومن كان صح..

دام قصتنا انتهت شيفيد ... صح ؟

دام كل له طريقه وعالمه ويمكن حبيبه..

ليه ماتستوعب الى راح راح..

ماعشقتك يوم لاجل انك حنون..

ولا اظنك شفت في برقي سكون..

اختلفنا كم تذكر يوم كان الحب اكبر..

يالي كان اليوم لا يمكن يكون..

اي صح..

الغلط والصح عقب ما نوصل للنهايه يتساوون..

علاقه بين اثنين انتهت بخلاف لو مهما كان نوع الخلاف..

وانتهت بفراق..

ما تفرق منو الصح ومنو الغلط..

يفضل انه ما ينسأل هالسؤال في الحالتين..

اذا كنت حاب ترد العلاقه مع هالشخص..

او انك تبي تبرر موقفك حتى لو ما ودك ترجعون لبعض..

اذا بخاطرك ترد العلاقه يفضل ان ما تييب هالطاري عشان لا تفتح عليك بيبان تسكرت..

حاول تبدي صفحه يديده من غيراتهامات انا صح وانت غلط..

تبي تبرر موقفك وتطلع من هالسالفه وللابد بس بطيب وانك ما تشيل بقلبك ولا تبي الشخص الثاني يذكرك الا بالخير..

هم نفس الموضوع.. سكر على باب الاتهام .. ولا تدور بدفاتر القديمه..

شياب الطاري؟؟

رفيجت اختي..

تناقشنا بهالموضوع عقب الغدا..

كان رايها ان تبطل الموضوع وتسمع..

تبي تعرف منو كان صح ومنو الي غلط..

بالحرف الواحد قالت..

احس يهمني اعرف.. يمكن نكون فاهمين بعض غلط او ان كل واحد يبرر موقفه حتى لو ماكو امل انرد حق بعض.. بس حلو ان نفترق و مانكون شايلين على بعض شي.. و هم عشان نستفيد من الغلط و ما نكرره.. لأنه اخاف اكون انا الغلطانه فمو حلوه لي بعدين.. اهم شي تصفى النفوس و خلاص محد يشيل على احد..

كلامها يمكن يقنع بعضكم..

بس بما اني مؤمنه بمقوله لي فات الفوت ما ينفع الصوت...

مو مقتنعه كلش ملش..

بالاخير اقول..

تحية لنوال الكويتية لدفاعها المستميت عن مشاعر الحب الساميه بزمن ينطربون فيه على اغنية مين ده الي ما يعرف دودو :)

وليه تسأل...

طيب.. وبعدين؟

مسااااااء الخير

طيبه = ساذجه
طيبه = هبله
طيبه = غبية
طيبه = ضعيفه الشخصيه
طيبه = قابله للضغاط والسخريه
طيبه = الطعن فيها حلال
طيبه = قابله للاستغلال

طبعا مو لان زمنا هذا معاييره اختلفت..

يقول الامام الشافعي:

نعيب زماننا والعيـب فينـا ... وما لزماننا عيـب سوانـا
ونهجوا ذا الزمان بغير ذنبٍ ... ولو نطق الزمان لنا هجانـا
وليس الذئب يأكل لحم ذئبٍ ... ويأكل بعضنا بعضا عيانـا


بس مجرد تمتعك بهالميزه الي ما فيها متعه كلش ..لانها ما راح اتييبلك الا التعب..لانك بتشيل قلبك النازف بين ايدك..

الكل يجرح فيك..وحتى اذا حاولت تزعل او تاخذ موقف.. قلبك ما يعينك..ترد تسامح..

ويردون يجرحونك.. لان الطيب ما له تقدير ولا احترام ...

الامام الشافعي يقول :

لما عفوت ولم أحقد على أحدٍ ... أرحت نفسي من هم العداوات
إني أحيي عدوي عند رؤيتـه ... أدفع الشر عنـي بالتحيـات
وأظهر البشر للإنسان أبغضه ... كما أن قد حشى قلبي محبات
الناس داء ودواء الناس قربهم ... وفي اعتزالهم قطع المـودات

تحاول .. وتحاول..

تدري عن الي يطعنونك بظهرك.. والي يجرحونك بويهك..

تدور الاعذار.. تبي تبرر لهم..

طيبه قلبك اكبر منهم..

تعطي اكثر وما تفكر انك تاخذ..

ما يهمك شكثر..اهم الي يهمونك..

ظنيت انك بتكسبهم.. لانك ما تحب تخسرهم..

والنهايه انك خسرت نفسك.. وهم ما كسبتهم..

وتكتشف ان قطع الموده ارحم من جرح كل مره..


فيرد يقول الامام الشافعي:


إذا المـرء لا يرعـاك إلا تكلـفـاً ... فدعـه ولا تكثـر عليـه التأسـفـا
ففي الناس أبدال وفي الترك راحـة ... وفي القلب صبر للحبيب ولـو جفـا
فما كل مـن تهـواه يهـواك قلبـه ... ولا كل من صافيته لـك قـد صفـا
إذا لم يكـن صفـو الـوداد طبيعـة ... فـلا خيـر فـي ود يجـيء تكلفـا
ولا خير فـي خـل يخـون خليلـه ... ويلقـاه مـن بعـد المـودة بالجفـا
وينكـر عيشـاً قـد تقـادم عـهـده ... ويظهر سراً كان بالأمس فـي خفـا
سلام على الدنيا إذا لم يكن بها صديق ... صـدوق صـادق الوعـد منصـفـا

بس الشي الي يهون عليك اكيد شرف المحاوله.. الحفاظ على قيمك ومبادئك.. وانك ما تغيرت نفس الي تغيرو..

الصيد في الماي العكر

عدنا والعود احمدووو..

الصيد بالماي العكر..

والصياد الشاطر الي يعكر الماي عشان يسهل على روحه..

مو مثل الذيب الي يستغل الضباب عشان يستفرد بضحيته..

لااا ..اهو اكثر خباثه ولؤم ودهاء.. مو بس يستغل الوضع..لااا... يزيد التازيم اكثر واكثر.. على كثر ما يقدر.. يخطط ويدبر ويلعب وبمهاره.. يستغل خلاف ويضخمه.. ويعكر الجو اكثر واكثر..عشان انت تطيح ولا احد يسمي عليك.. وتكثر سجاجينك من كل صوب و ما تدري طقاقك وين..

يستغل الخلاف الي بينك وبين الي تعزهم.. ولي تعتبرهم غاليين .. يتقرب منهم ويظهر المحبه الي فقدها منك.. ويحاول ياخذ الثقه الي اهتزت بداخله.. ثقه كانت لك..

في لحظه سوء فهم.. يبدي بالتدليس.. التغرير والتمويه.. يخش نقص موجود ويدعي كمال مفقود..يلبس ثوب الملاك.. يصير الام والاب.. الحنان والرقه كلهاااا تشع منه... يبرز كل مهاراته .. يحسن كل شي.. بس عشان ياخذ مكانك..

يستمتع ويحس بانجاز.. ونشوه وانتصار ..عقب نجاح هالمخططات..

بس هم شاطر.. ما يبين هالشعور يلعب بحذر..شغله بسكات.. يحسبها عدل وماشيه معاه صح..

المشكله ان هالشخص الي كان عزيز راح ينغر.. ما ينلام الله يلوم الي يلومه.. وانت ما راح تستوعب الوضع الا متاخر.. يعني بعد خراب ملطا..

بتقعد تراجع حساباتك..

تلاقي سوء الفهم اساسا ماكان يسوى.. الجو العام للمشكله حصل له تضخيم فوق العاده كان اهو سبب لتأزيم الامور.. وبتالي انعدمت الحلول..لانك تعديت خط الرجعه..

الحسنه الوحيده بالموضوع انك اكتشفت معادن الناس الي حولك.. عرفت منو رفيجك ومنو عدوك.. منو الي كان ينافقك.. ومنو الي صج عزك..

بالنسبه للي صار.. انا اقول الله يهني سعيد بسعيده...:)

سعيدين وبعيدين على قولت ماماتي الله يحفظها..

ما راح اقول طبعا اذا الحياه ما تمشي سعيده الا بفرقاي ففرقاي عيد..

بس بما اني مو من النوع الي يلعب لعبة الازمات والاساليب القذره .. فالانسحاب والويه بالويه ابيض احسن قرار..

من غير حسافه اكيد..

غير على العمر والعشره الي ضاعت .. على شي كنت احسبه غالي..

كلمة حق.. منو يقولها؟!!

صباح الخير..للي عندو صباح ومساء الخير للي عندو مساء..

اليوم يا طويلين الاعمار راح اتحلطم عن الشيطان الاخرس.

ولي ماخذين السلبيه عنوان ومنهج لحياتهم ..

صار من الصعب على الناس انها تقول كلمه حق هلأيام..

او حتى تعترض او توضح شغله غلط.. او تبرر تصرف غيرك.. من باب ابداء الراي ..

وخاصه لما نشوف شخصيه نرجسيه .. هالانسان الي يشوف روحه اهو الاحسن ..واهو الافضل والاذكى ..والناس كلهم لأ..ومع جذي يهمه راي الناس فيه.. مو عشان شي.. يبي المدح اكيد.. لان اذا ياله نقد او حتى تجاهل قامت الدنيا وما قعدت..

يستغل الناس ولا ترف له عين.. يلعب على الف حبل .. المهم يوصل للي اهو يبيه.. مشاعر الناس ما تهمه .. المهم اهو شنو يبي..

هالنرجسي يتيمعون دار مداره المنافقين وربع القيل والقال..

وبما انه يحب الاضواء تلاقيه يتمادى بمدح نفسه ويذم غيره...واكيد طبعا كلامه صح لان الحاشيه الي قاعده تطبله موافقه على كل كلمه يقولها من قبل لا يقولها بعد..

هالناس هذي معروفه وواضحه ما يحتاج ان الواحد يتكلم عنهم..

المشكله عندي بالي ساكتين عن الحق..

بالنسبه لي..

لو حقك وما طالبت فيه.. يعني انت مسامح بهالشي هذا ضياع حق..بس انت راضي.. انتهينااا

بس ناس تعزهم وما تفزع لهم؟؟ .. مو سالفه هوشه وذبح مذابح....لااااا

بس لما يغتابون صاحب لك او صديق او حتى معرفه.. ويقللون من قدره ومن قيمته وجدام مجموعه من الناس بعد..وانت شاهد و حاضر .. موجود وتشوف ان في ناس تأيد وانت عارف ان هالكلام ماله اساس من الصحه...

مو المفروض انك على الاقل تعترض؟؟... بس انك تسكت؟؟ ولا جنه اكو شي؟؟

انت ترضاها على روحك؟؟ترضى ان محد يرد غيبتك؟؟ بتعده شنو؟؟ شنو شعورك ؟؟ غير انك تحس بعدم اهتمام واللامبالاه بمشاعرك من شخص كنت عاده انسان قريب.. مو مثل الغير ..على اساس ان الي ما يعرفك ما ثمنك..

امي الله يطولي بعمرها ويحفظها لي كلا تقول الي ما يعدني فايده..ما اعده راس مال..

اذا حتى كلمه حق ورد غيبه ..او انك تقول رايك بشي انت تشوفه صح.. ما تقدرتقول .. وما تطلع منك هالكلمه.. لخوف او مصلحه...

ليش عايش؟؟

الموت احسن من هالحياه..

أنا ضد الإكتفاء على التأكيدات :ما انزل لمستواه.. أنا احسن منه اسكت عنه .. و السكوت من ذهب .. إلخ .

كلمه حق ولازم تنقال ..

فإما حياة تسر الصديق...وإما ممات يغيض العدى..

الحل؟؟

انك تاخذ قرار وموقف...

كلمه لأ .

راح تكون كافيه ووافيه ..

توقف هالناس عند حدهم وتفهمهم انك رافض هالشي ومومعاهم..

جرب تقولها.. ماراح تخسر..

عادي .. طبيعي ..مزاجي... دووم ما حاتي

مساكم الله طيب...

لا طبعا مو اغنيه الجسمي...

بس ما لقيت احسن من هالتوبك للكلام الي بتقرونه الحين..

تقلب المزاج عند بعض الاشخاص شي غريب ومزعج وااايد في بعض الاحيان..

من الطبيعي للعادي لي الاعصاب وعقبها عدم المبالاه..

طول عمري اقول ان الناس طاقات..بالتحمل والصبر ..

محد صبر كثر ايوب عليه السلام بس منو فينا يقدر يصير ايوب؟؟ او حتى يتمنى هالشي؟؟

ما اعتقد احد يتمنى ان يصبر.. عن نفسي انا اقولها ما فيني صبر ..

يمكن لاني عصبيه واي شي يحرني.. حتى لو ما عبرت عن الي بداخلي حزتها بس هم ما يمر مرور الكرام.. لاني اكيد خذيت موقف..

المزاجيين يحرون الواحد..

عبالهم الكون ماشي على مزاجهم ومشتهاتهم..

اليوم يحب هذا باجر يكرهه..شوي رفيجك وشوي كثرهم عدوك ..

ما يرضى عليك واهو الي يجرحك... قمه التناقض..

انزين لو مزاجي على روحك محد له شغل فيك..بس مزاجي بتعاملك مع الناس.. شتوقع منهم؟؟

اول شي انت تصعب على الناس انهم يتقبولنك لانهم ان طوفولك مره وثنتين ..بيطوفون لك الثالثه؟؟ اتوقع لي متى؟؟

راح ينحاشون منك ويتحاشونك.. وعلى شنو؟؟ شنو السبب؟ .. المشكله ان ماكو سبب

انا فاهمه ان محد كامل ..والمزاجي هذا اكيد فيه صفات ثانيه تسوى ان الواحد يتحمله عشانها..

بس اذا طفح الكيل لا تامن السيل.. وقد اعذر من انذر..

يعني ما يصير عشان مزاجك متعكر تاخذ الامور بعصبيه وسوء ظن في الناس الي حولك وتكون حساس من كلمه تكبرها وتصير ازمه او من موقف عادي يسبب كره.. واتحول بقدره قادر حق مريض نفسي يعاني من البرانويا.. والناس تستغرب منك .. هذااا شفيه؟؟

نصيحه للمزاجيين... القراءه زينه .. كتاب (لاتهتم بصغائر الأمور فكل الأمور صغائر) للدكتور ريتشارد كارلسون.

فكر شوي وبعقل قبل لا تخسر الي حولك..

أحمد مطر

من اروع ما قريت لدرجه قررت اخليها توقيع لي :

يَغْشَى الأَسَى رُؤايْ
يَظُنُّني سِوايْ.
لكنْ.. يَعودُ القَهقَرى
منُكَسرِاً.. حِينَ يَرى
في وَهَني قُوايْ
وَمُنتهى بدايتي
في بَدْءِ مُنتهايْ!
***
يأسَى بداخلي الأسَى
لأَنَّهُ مَهْما قسا
يَبقى هَشيماً يابسا
تَسحَقُهُ مُنايْ!
***
لَستُ أَتيهُ عِندَما
يُصابُ عَصْري بالعَمَى
فالدَّربُ يَمشي حَيثُما
تَحرَّكتْ خُطايْ!
***
لَستُ أَبيتُ خائِفا.
فاللّيلُ مِن ليلي اختفى.
والصُّبْحُ كُلَّما غَفا
أَيقَظَهُ ضُحايْ!
***
فِرعَونُ لَيسَ مُقلِقي
واليَمُّ لَيسَ مُغرِقي.
بُحورُ شِعْري طُرُقي
وريشتي عَصايْ!
***
لو أنَّ فرِعونَ سَما
حتّى تَجاوَزَ السَّما
وَمَدَّ مِنها سُلَّما..
لم يَستطِعْ أن يَرتقي
لِدونِ مُستوايْ!
***
أَنا أَنا.. مُنَى المُنى
دَليلُ رِحْلَةِ السَّنا
جابرُ فاقَةِ الغِنى
مَلجأُ ما عَدايْ!
***
أنا أسَى كُلِّ الأَسَى.
ولو أَصابني الأَسَى
لَما شَعَرْتُ بالأَسَى
إلّا على أسايْ!

صداقه في عالم الانترنت

مساكم الله طيب :)

اليوم يا محافيظ السلامه عيد ميلادي المجيد...

اكيد بتقولون حشى ما صارت صدام حسين...شالطاري الاقشر..

المهم طبعااا ومثل ما الكل عارف وطبعا راح اناقش هالشي هني لانه باط جبدي... بس بعدين...ان من الذوق انك ما تسأل المرأه عن عمرها..
طبعا بالنسبه لي لا عمرها ولا وزنها ولا طولها ولا عرضها ولا عن اي شي لين اهيا تسولف بروحهااا يكون احسن.. يعني من الاخير عن اللقافه لحد يسألني جم عمرج .....

فالبارح حاشتني مشاعر مخربطه...

استغربتها.. على كثر ما ونستني..

بما اني مدمنه بالتوك من سنين..
والي ما يعرف البالتوك اهو برنامج محادثه صوتي تقدر تنزله عن طريق http://www.paltalk.com/
بس صارلي اكثر من سنتين مع روم واحد فقط لا غير..

عرفت فيه ناس واجناس..كونت صداقات .. وبعد عداوات..

يعني نقدر انقول انه شي عادي .. يمكن احد يقول شكو عيل غاثتنا... اقولهم صبرا جميلااا..

الي صار ان الساعه 12 قلب حال الروم 360 درجه.. وهالشي ما راح تعرفون شلون الا اذا سولفنا عن الروم اول شي..

الروم فيها يوزرات مقيمه بصوره دائمه مثلي وشرواي..ومنهم يوزرات ومنهم ادمنيه..

يحكمنا قانون الروم الي سنه واقره الاونر ومجلس الادمنيه الي انا منهم .. احممممممم

والقانون ينص على ..

الممنوعات:
1 الجمب.. والي ما يعرف شنو يعني يدش البالتوك ويشوف..
2 تبديل الادوار.
3 التلفظ بكلمات او عبارات تخدش الحياء او الذوق العام.
4 التحدث بلغه اخرى غير اللغه العربيه او الانجليزيه
5 الاغاني من 5 الفجر لي 5 العصر ... يعني من عقب هالفتره ماكو اغاني....

الروم قبل سنه وشي كان شي خيال... ما ينوصف ...ضحك ووناسه وغشمره... بس طبعا دوام الحال من المحال...

ناس دشت الروم.. وناس طلعت ...ناست خربت .. وناس تحاول تعدل.. وناس وانا منهم صامدين ... لي متى؟؟؟ ما يندرى
وناس اعتزلت وانقرضت لاسباب وايد.. الي تزوج والي لهى بدراسته والي توظف ولي زعلان وما يبي يدش :(....

انا علاقتي حلوه مع الكل... المحترم يحترم وينحط على الراس والعين...الي يحاول يملق عندي دوا ممتاز ... اسمه الحقران...
وغيره الي يزودهاااا سبحان الله ما اشوفه بالروم بس الاقي F7 وجمله ابعد وغيب عنا الروم من غيرك جنه :)....

بس في يوزرات حبهم يدرعم بالقلب بدون استئذان..بنات وشباب.. مع العلم ان انا معروف عني اني نصيره البنات بس مو معناته ان مو بالحق..وهالشي يسبب لي بعض العداوات..

ما عليناا..

الي صار البارح..

عقب الساعه 12

استلم ذاك الايميل.. من اعز بنات الروم على قلبي وكل وحده فيهم كاتبه بايدها كلام لي ووصورته بالسكانر وطرشووه...

يمكن شي عادي او تافه للي يقرى... بس بالنسبه لي انا...

انا آخر مره شفت فيها احد يكتب شي بخاطره او قلبه بيده لاحد كان 1997.

وايد استانست من الحركه...

انرد للروم..

الروم كل الي اعزهم ارفعو ايدهم ومسكو دور ومن 12 لي 2 الفير اغاني عيد ميلاد لي انا.. مع العلم اغلبنا موظفين وطلاب والبوم دوامات يعني الله يعينهم على يومهم ..شكلهم راح يلعنون هاليوم ما سوت عليهم ...
لحد يقولي مجامله او لمصلحه...ماكانو مجبورين ولا مغصوبين.. شراح يستفيدون؟؟..

هالمشاعر الحلوه هذي استغربتها مو لانها منهم...يعني مو لاني ما توقعتها منهم كاشخاص...

بس لانها مشاعر من ناس ما شافوني ولا شفتهم.. علاقه نت لا اكثر..

وقت الي اعرفهم بره نسووو عيدي.. ولو ما اذكرهم ما يدرون...

لحد يقولي شالسخافه ... كلا عيد ميلاد...

اهي مسأله تقدير وذوق .. ترى انا مو ناسيه يا فلانه عيد ميلادج..هالشي حلووو.. يابابا ما نبي هدايا كلمه طيبه للي تعزهم وانك تراويهم انك تذكرهم تسوى...

على الاقل عندي تسوى...

في مره كنت قاعده في صاله بيتنا وامي الله يحفظها لي ويطول بعمرها حاطه مسلسل ومطوله الصوت حده..

ولا اسمع جمله كان نور الشريف يقولها لعياله " التعبير عن الحب اهم من الحب نفسه"

هالشي خلاني اقرر تغيير حساباتي...

قناعاتي...

وعلاقاتي..

شنو استفدنا اليوم من قرقتي؟؟...

الصداقه .. والاهم التعبير عن هالمشاعر لو ببساطه

بداية نهاية من البداية

ما راح اتفلسف وايد البداية كانت ان ولد خالي قرر ان يسوي وهالحجي من سنتين مدونه...

وفعلا هالشي صار..وقالي ...وكالعاده بما اني جدا مشغوله بالولا شي الي انا دايما مشغوله فيه ما شفتها ولاحتى القيت نظره..

قبل جم يوم وانا اتصفح جريدة الجريدة على النت ولا ادخل آخر كلام ولا اشوف المدونات..

طبعا شدني هالشي وااااااااايد..

فقررت اني راح ابدي على السنه اليديده...

وبما ان عيد ميلادي اليوم...فقررت ان السنه اليديده بدت...

وعلى اساسها طلعت قرارات هم يديده بتغير شامل كامل..

من ابرزها اني افضفض بلي في قلبي وبالي..

وهالشي وين بسويه؟؟

ما يبيلهاااااا..

هني طبعااااا

الله يعينكم يلي تقرون...

كاسرين خاطري من الحين..

بس ما عليه...

بسم الله نبدي...